網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年3月1日 星期四

布吉預支蜜月箝實男家親友 35歲阿 Sa趕住嫁 [壹週刊 - 1460 - 生活] __,阿 Sa,蔡卓妍,M1,

20/2趁農曆新年,阿Sa攞假同男友飛布吉享受陽光海灘。探熱針布吉預支蜜月箝實男家親友35歲阿Sa趕住嫁36歲的阿嬌宣布嫁人,同「醫界男神」賴弘國即將 ...






20/2

趁農曆新年,阿 Sa攞假同男友飛布吉享受陽光海灘。

探熱針

布吉預支蜜月箝實男家親友 35歲阿 Sa趕住嫁

36歲的阿嬌宣布嫁人,同「醫界男神」賴弘國即將拉埋天窗。好姊妹搵到歸宿,阿 Sa都唔輸蝕,搭上「百億麻雀館太子爺」石恆聰( Anthony),拍拖一年經常糖黐豆,阿 Sa更火速融入石家,陪男友出席家人聚會,睇嚟都好快上岸!

兩姊妹一樣「戀愛大過天」,今個農曆新年,阿 Sa提早向公司攞假,孖住男友飛布吉享受陽光海灘。

包到冚出發

上週二(二月二十日),阿 Sa同 Anthony到達機場後,急急腳行去 check in櫃位,著住風褸加牛仔褲的阿 Sa,戴齊 cap帽、口罩包到冚,剩係得番對眼, Anthony就一個人拉住兩個大喼,有男友做阿四,阿 Sa繑埋手齋睇。撞啱長假期,機場勁多人,阿 Sa同 Anthony一直保持距離,甚少交流,阿 Sa更不時兩頭望,一見到鏡頭即刻擰轉面閃避。

Check完 in, Anthony即刻轉身走人,阿 Sa拎完登機證後,快步跟實男友。排隊等入閘, Anthony keep住撳電話,阿 Sa一直尾隨,繼續零交流,雖然阿 Sa包到實一實,但依然俾途人認出,見到人眼望望,阿 Sa開始唔耐煩,入閘時面燶燶。





臨入閘,包到冚的阿 Sa終於掀開口罩。





隔住兩個身位, Anthony終於撩阿 Sa講嘢。





Check in期間,兩人 keep住零交流。

罕有晒泳照





到埗後,阿 Sa晒玉背相,相信係 Anthony操刀。

去到目的地,阿 Sa急不及待打卡,在 Ig上載泳照,相中阿 Sa著住吊帶背心騷玉背,呢張玉背相肯定係 Anthony操刀,阿 Sa仲留言話:「 Nice beach! Nice sunset!」

四日三夜眨吓眼就過,返港當日,同出發時著同一套衫的阿 Sa,一支箭標出閘,拎行李粗重功夫繼續交俾男友,相隔廿分鐘, Anthony推住行李施施然步出,上了阿 Sa的保母車齊齊返歸。

冧掂未來姑奶

當年阿 Sa秘密嫁俾爛玩鄭中基,終於離婚收場,之後同 William一段姊弟戀再受重創。上年六月,阿 Sa被踢爆撻着麻雀館闊少 Anthony,男家坐擁百億身家, Anthony父親石鑑輝有「麻雀大王」之稱,生意遍布海外華人區,財雄勢大。而 Anthony則主力打理家族物業資產,名副其實係富二代。

三十五歲的阿 Sa去年從連詩雅手上得到筍盤後,愛得瞓身投入,更着手行「奶奶政策」,極速融入石家,兩個月前阿 Sa以「準石家新抱」身份,同男友家人飛去印度出席婚禮,事後 Anthony胞妺石佩藍更大讚阿 Sa:「好 nice!佢哋未拍拖之前已經識,我哋共同朋友係馬天佑,對佢印象好好!」有「未來姑奶」撐腰,阿 Sa要嫁入石家,應該冇難度!

「見到阿嬌咁開心咁幸福,阿 Sa本身唔心急,而家都有啲恨啦,加上佢同男家屋企人關係咁 close,好似一家人咁,其實身邊啲人都估佢哋好事近㗎喇,係睇吓 Anthony幾時出手啫!」阿 Sa身邊人透露。





相隔廿分鐘, Anthony推住行李施施然步出。





24/2

返港當晚,阿 Sa一支箭出閘,其間不停撳電話。





去年底,阿 Sa跟住 Anthony飛去印度,出席男友家人婚禮。





好姊妹阿嬌即將嫁人,令到阿 Sa都心急恨嫁。





最近忙住拍網劇《 PTU機動部隊》,阿 Sa開拍前已經申請攞假。

要脅罷拍





阿 Sa同「未來姑奶」石佩藍(左二)早已認識,更有指阿 Sa是在形象指導馬天佑穿針引線下認識 Anthony。

難得搵到真愛,阿 Sa就算忙到甩轆,都要抽時間箝實男友。短短半年,阿 Sa已經請足三次長假,陪男友出埠,繼去年七月,二人蜜遊東京,十二月再去印度家庭旅行。最近忙住為網劇《 PTU機動部隊》趕工,開拍前阿 Sa已經同經理人 Mani講掂數,農曆新年要放長假,陪男友出埠過二人世界。

「其實阿 Sa每逢過年都會 request放假,陪屋企人去拜年,所以接呢套劇之前佢已經同 Mani講明除咗紅日嗰幾日之外,仲要攞多幾日假,如果唔係佢就唔接喇!其實原本佢想放兩星期去歐洲㗎,不過劇組真係就唔到。」阿 Sa身邊人說。

愈嫁愈豪

圈中不少失婚女藝人,就算過了三張,依然搵到第二春,翻頭嫁更幸福





陳伶俐

98年嫁林敏驄並誕下兩子, 08年女方被爆偷食導致離婚, 12年,陳伶俐帶住兩個仔,再秘嫁新加坡隱形富豪胡嘉烈後人劉頌銘,更為劉家誕下一名兒子,開枝散葉。





朱玲玲

04年跟霍震霆辦妥離婚後, 08年 11月與身家逾百億的香港瑞安集團主席羅康瑞,於新加坡四季酒店註冊再婚,兩名兒子霍啟人及啟山均有出席婚宴。





黃婉佩

2R成員黃婉佩 Race曾被爆與新加坡商人陳靖諧秘婚,二人離婚後, 16年 Race再嫁新加坡富商 David Loh,不久便誕下女兒,現住價值一億的大屋,過着幸福少奶奶生活。





陳少霞

00年與澳洲籍華裔商人結婚,其後老公生意失敗破產兼離婚, 14年,因前夫逝世,頓失經濟支柱的陳少霞,帶住兩個女完全透支;臨近四張,陳少霞成功標尾會, 16年與身家億計、被稱法拉利之父的富豪李文輝結婚,陳少霞住豪宅,出入有司機,遊埠過闊太生活。

撰文:娛樂組

攝影:李溢敏、陳亦龍、蕭敬漁


鍾意就快D Share啦!