英皇電影趁香港國際影視展開鑼，今午舉行盛大記者會，公布2018年開拍及推出的電影，當中包括劉青雲及張家輝主演的《廉政行動 煙幕》、蔡卓妍、周柏豪及衛詩雅主演的《感動我77次》、甄子丹主演的《火拼》等。
林超賢再同張家輝合作
至於「賣座導演」林超賢則宣布相隔5、6年再與張家輝「合體」，計劃今年底開拍一部地道港產警匪片，暑假左右林導則率先與中華人民共和國交通運輸部及中央台合作，開拍一部以救援工作為題材的新戲！
齊齊影大合照
一眾主演包括劉青雲、張家輝、林嘉欣、甄子丹、蔡卓妍、周柏豪、林峯、湯怡、原島大地及衛詩雅等紛紛於記者會上亮相，又與集團主席楊受成齊齊影大合照，場面相當熱鬧。家輝與青雲講述《廉》戲即將開拍，不忘互笠高帽，劉青雲搞笑謂：「我嘅角色係忠嘅，但忠唔晒。家輝係衰嘅，但又衰唔晒！」引得全場發笑。
張家輝與劉青雲受訪時透露《廉》片四月開拍，但對角色細節家輝笑言未知情：「淨係知會畀青雲打，因為我同麥兆輝各有各忙，有段時間冇聯絡，不過今晚會收劇本嘞。」
同原島大地「重逢」
劉青雲於台上與原島大地「重逢」，司儀要求青雲模仿當年二人拍《忘不了》時，他抱起大地的場面，劉青雲靦腆謂：「咁大個嘞，費事畀人話（性侵）」煞而青雲對大地讚口不絕：「好記得佢喺片場唔使瞓，好有活動、好精神，好啱做呢行！」張家輝聞言搞笑說：「咁精神可能係精神病，我年輕都患過病，不過醫番好嘞！」《廉》片導演麥兆輝則表示該片將有3部曲，除《煙幕》外，《黑幕》及《內幕》亦會陸續開拍。
另外，甄子丹將參演陳木勝電影《火拼》，暫時將到南美犯罪之城進行拍攝，但甄子丹表示詳情未有定案，但已有心理準備「打餐死」。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|