齋靠一張黑白童年照，現年56歲嘅黃秋生就係咁樣展開咗佢嘅尋親之旅，差唔多用咗一年時間，終於搵到兩位哥哥，佢哋仲嚟咗香港見吓呢位影帝細佬！
開頭感覺唔相信
秋生接受訪問時表示：「呢次尋親之旅係無心插柳，係有一晚飲咗酒之後，就諗現今科技先進，係咪可以放張同父母嘅合照上網試吓搵呢？之後同BBC做訪問，講屋企呢一part其實好少，不過出咗街之後好多外國人睇到，冇耐就有位外國女士幫手搵咗爸爸嘅家族人名列表畀我，當時我覺得好神奇，訪問出街兩個星期就可以搵齊晒啲資料？開頭係有啲『唔係呀話』嘅感覺，驚訝咁快之餘亦都開心。」
阿媽表現好激動
問到秋生終於同兩位哥哥喺香港見面有乜嘢感覺？佢就話：「見面嘅時候好多嘢講好多嘢傾，佢哋講番以前爸爸喺香港做乜。」秋生笑言與兩位哥哥不停傾不停食，遲早會好似兩位哥哥咁有個大肚腩。除咗探秋生之外，兩位哥哥亦有去探秋生媽咪，秋生媽因為中風行動不便，不過一見到兩位哥哥即刻表現得好激動：「我冇同阿媽講過佢哋嘅身份，唔知點解一見到兩位哥，佢就表現得好激動，佢應該係知我同兩位哥哥嘅關係，阿媽好似想講嘢同起身咁樣，見到阿媽咁激動，我都好快拉咗兩位哥哥走人。」
大團圓BBQ
散失多年終於見面，問到秋生喺咁感人嘅場面下有冇喊？秋生表示：「唔會你估《家春秋》咩！我哋約咗遲啲可能聖誕節一齊BBQ，依家兩邊加埋好大family，我都未試過咁多人一齊BBQ。」
唔覺影帝細有特別
兩位哥哥突然發現有個影帝級嘅細佬會唔會好驚訝？秋生笑言佢哋冇乜反應：「其實我都係普通人一個，如果係監犯就話特別啫，演藝都係我嘅事業，佢哋同我嘅關係，同身份係冇關，有個哥哥上網睇過我啲資料，見到面之後都唔覺得有乜嘢特別，反而出到街，佢哋見到好多途人搵我合照，佢哋先覺得好得意，仲搞笑話我都要合照埋一份，係佢哋眼中我嘅演員身份只係錦上添花。」
與兩位哥哥的4日3夜見面之旅，秋生帶咗佢哋去唔少地方玩，其中一日仲撞到英皇集團老闆楊受成，秋生表示楊生好好客，仲請佢哋食飯，不過對於秋生呢個神奇尋親之旅，楊生好似唔多信，仲笑言秋生係咪作古仔整鬼佢。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
