2013年有一段小插曲。時任足球總會副主席嘅貝鈞奇，控告一份報章09年刊登一篇有關屯門普高球會涉嫌「打假波」社評文章內容，對佢構成誹謗，案件在高院審理。庭上播放涉案之球賽片段，有埋足球評述員旁述的聲音。法官於播放完畢後，主動稱：「我認得把聲係潘宗明。」當時庭上眾人未及反應，代表被告嘅資深大律師石永泰稍後向法官澄清：「其實係馬啟仁。」
另一段小插曲，發生於2012年，當年無綫同亞視取得200小時倫敦奧運播映權，仲聯手做節目。無綫派出潘宗明、徐嘉樂、李思雅、鍾志光主持直播賽事，但表現似乎不協調，其中潘宗明、徐嘉樂同李思雅被批不專業、不中立兼搶對白，真係夠晒「熱鬧」。
事隔數年，潘宗明呢個名，大家可能早已遺忘，取而代之嘅可能係馬啟仁，可能係鍾志光，但80末，到90年代，幾乎一開電視，都會見到潘宗明。入行之前做教書嘅潘宗明，備受無綫重用，派佢主持《球迷世界》、《體育世界》、《寰宇風情》，跟住又喺《K-100》同《歡樂今宵》都見到佢嘅蹤影，佢亦都曾經代表香港出去採訪一啲大型嘅體育盛事，好似88年去咗漢城奧運實地採訪，維基都有特別提番佢95年喺香港政府大球場主持賀歲杯決賽現場直播時，成功令現場觀眾玩「人浪」經典一幕。
潘宗明離開香港移居加拿大，佢喺加拿大中文電台同新時代電視擔任節目主持，其間亦有返嚟香港擔任奧運主持，佢仲同唔少圈中人都有keep住聯絡，其中一個就係阿姐汪明荃。阿姐今日凌晨喺fb貼咗張同埋潘宗明夫婦嘅合照，佢仲留言話：「有朋自遠方來 不亦樂乎、與好朋友潘宗明夫婦tea一tea.」
有網民留言讚今年已經59歲嘅潘宗明keep得好好，老朋友難得見面，戥佢哋好開心，亦有人話當年係阿姐做媒人，撮合呢段姻緣！查實睇番啲舊相，佢同當年做主持個樣，又真係分別唔大喎，而且頭髮仲厚咗濃密咗，係加國水土好啲定係「後天加工」呢？
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
