現年45歲的藝人海俊傑在1994年參加新秀入行，其後簽約華星，之後亦分別簽過無綫及亞視，拍過不少劇集。近幾年他把工作重心轉向內地，曾參與劇集及網絡大電影的拍攝，他分享在內地工作的所見所聞，坦言內地製作團隊其實挺喜歡用香港演員，因為有職業操守及禮貌，但他就不點名大爆有些新一代的內地當紅演員十分大牌：「有一次全部人攞住劇本圍埋對戲同練排位，女主角一號就坐喺度唔郁，其實佢有嘢要郁，咁我唔會鬧人，但就贈一贈佢話『你啱啱排嗰陣係企定坐㗎？我唔係好記得』，佢就即刻彈起身，其實佢哋係尊業嘅，台詞、喊都做足，但就唔尊重大家。」
計劃一年後生B
講到北上工作6年，問到賺夠人仔置業未？海俊傑坦言在北京的物業是租，笑言待生仔之後才買樓：「老婆同我都恨生，見到細佬妹個個都生，我都要生㗎啦，佢哋話年紀大會冇力同小朋友玩，但其實我唔係好認老，我一星期做5日運動。（計劃幾時生仔？）一年啦，但要睇上天安排，唔係話有就有。」講到他去年結婚，問到婚後的轉變？他坦言：「結婚講嗰段誓言好緊要，結婚真係一生一世，好多時啲人話冇愛、冇passion（激情）就離婚，但其實呢啲係要自己創造，例如生日同節日係要刻意安排驚喜，唔係話老夫老妻就唔使做，同埋我哋好低能，就算到六、七十歲我哋都依然會係咁，係keep住兩個人嘅情趣。」
重返香港樂壇
婚姻生活美滿，工作方面海俊傑亦有新動向，最近簽下新公司的他宣布將重返香港樂壇，推出廣東及國語歌。他坦言其實這幾年都有唱歌，直至去年婚宴重遇昔日老闆陳欣健，才成功拉攏他簽新公司：「完咗婚宴我同佢講想唱番歌，佢就話搵日食飯，仲介紹咗依家個老闆畀我識。」他表示現時正在揀歌，今年會唱歌及拍內地戲兩邊工作。他亦透露之前上無綫節目《流行經典50年》，見番同屆新人獎金獎得主古巨基：「我係銀獎，如果有埋曹永廉，我哋金銀銅得主就齊晒。」
場地：秋澗爐端燒
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
