35歲嘅張建聲喺舊年憑網劇《反黑》彈出，佢飾演嘅反派「招積」受到網友激讚，事業時來運到，連戀情都有著落，喺5月嘅時候，被爆出同師妹陳嘉莉(Kelly)撻著，嗰陣佢話大家都係雙魚座好啱傾，公開戀情之後，人前人後都表現恩愛，喺今年農曆新年前，老闆蕭定一幫阿聲推出咗一系列「招積」嘅產品，身為女友嘅Kelly當然有現身撐場，嗰時阿聲仲話儲緊老婆本，問Kelly願唔願嫁畀阿聲時，她都甜爆話睇佢乖唔乖再考慮。
點知當阿聲嘅事業發展得越嚟越順利嘅時候，竟然令到佢同Kelly嘅距離拉遠咗，阿聲前日喺fb公佈「分」訊，佢話同Kelly已經分開咗一段時間，原因係事業心重而忽略咗身邊人，最後經過認真考慮，決定先放手，各自專注於工作上，阿聲仲話好多謝女友喺呢兩年嘅照顧、體諒同付出，希望佢可以幸福快樂，開開心心。
唔少人都對佢哋分手感到可惜，不過有知情者向《蘋果》爆料，指阿聲今年3月開拍電影《作家的謊言》時，同熱情如火嘅日本妹松岡李那撻着，扮演情侶，兩人接觸多咗，戲假情真，松岡熱情融化阿聲，戲裏戲外，兩人都密密約會，阿聲暗撻松岡時，仍未同Kelly斬纜，似有劈腿之嫌！
據知松岡成日喺人前大讚阿聲係好男仔，明顯冧爆對方，雖然今年3月蕭定一公司搞annual dinner，松岡同緋聞男友周焯華（洗米華）同場，有指當日洗米華原被安排同蕭定一坐主家席，松岡則跟阿聲等坐另一枱，相隔甚遠，但洗米華一見松岡即開心走過去吹水，阿聲都醒目讓位。不過，洗米華走後，松岡先同阿聲密密斟，兩人最後仲跟咗林盛斌（Bob）車轉私竇直落再蒲。同場嘅Kelly同阿聲零交流，全程受到冷落，未見昔日糖黐豆嘅畫面，雖然Kelly好想箍實男友，但有心無力，始終舊不如新！
回復單身嘅阿聲強調專注工作，之不過問到同松崗嘅關係，佢前晚回覆《蘋果》就話：「冇呀，我哋係拍戲拍檔，佢係一個好對手。」兩人有發展空間嗎？阿聲再話：「零發展空間，我o依家想專心事業先，將來嘢將來先知。」
松岡昨日回覆《蘋果》，佢短訊話：「I saw his Instagram.They broke up!」佢話睇阿聲Ig知佢同正印Kelly分手，至於佢同阿聲爆緋聞，松岡否認：「Why me? Lol crazy！I didn’t talk with Justin after finish movie！」佢話唔明點解傳緋聞，佢聲稱《作》片煞科後冇同阿聲聯絡。
另松岡經理人王友良回應《蘋果》話：「佢哋兩個人（松岡及張建聲）冇任何嘢發生，私下冇見面冇聯絡，完全係工作關係，可能係為咗電影宣傳，對呢件事我哋有啲無奈，佢哋絕對冇可能發展。阿女（松岡）剛剛打俾我，話佢同對方連一齊出嚟玩同私下見面都冇，又何來拍拖，松岡為咗呢件事好嬲，話件事假到爆。」
|
鍾意就快D Share啦！
|
|
|
