《宮心計2之深宮計》噚晚喺無綫首播，「古裝劇收視之王」馬浚偉擔正，仲有美女如雲——不過就有人幫佢哋計過條數，話12位主要女角，包括胡定欣、劉心悠、周秀娜、張慧儀、羅霖、陳煒、黃心穎等等合共逾500歲，平均年齡超過46歲，嗯……
宮闈劇鬥生鬥死爾虞我詐，睇呢啲劇，其實同返工分別唔大……套劇噚晚先播第一集，好看與否言之尚早。好可惜，大陸網民到依家，都未能喺騰訊睇到《深宮計》（新聞連結： https://bit.ly/2IWnp46 ）各種傳聞亦不逕而走，最大可能係——「國家廣播電視總局」未審批。
其實《深宮計》喺騰訊播出無期，並不令人意外。范冰冰與高雲翔主演嘅重頭大製作《巴清傳》，疑因偏離習近平提倡之闡揚中華文化原則，且習總夫人彭麗媛早前「下旨」唔可以播負能量「宮鬥劇」，而《巴清傳》描寫秦始皇一統天下嘅劇情，卻與中共如今政局暗合，結果，呢套五億人仔大製作，一直播映無期。有指唐德影視後來大量修改劇情，「故事背景都改為架空」狀態，終於露出一線曙光，但隨即爆出男主角高雲翔涉性侵事件。
騰訊冇得睇《深宮計》，咁點算好呢？有人話，百度雲有喎！微博上不少網民留言「求片」，有不人以「勝利者」姿態回應：「TVB迷可要抱緊我呀，粵語國語都有哦。宮心計百度雲一次性看好多集，爽歪歪，鏈結已經藏好啦，要跟我一起嗎？」類似咁嘅回應都有唔少，大部份都係話自己喺百度雲有得睇，呼籲大家想睇就「加我」
至於騰訊噚晚臨時臨急話唔播得，都引發一場不小的公關災難——因為本來係話八點播嘅，但大家等極都唔見有。到晚上11點43分，騰訊先至更新微博話：「親愛的朋友們，原計劃於今晚上線的《宮心計2深宮計》因故暫時延期，具體播出時間敬請關注我們後續發佈的官方消息。對於此次播出時間的調整，給觀眾造成的不便，我們深表歉意，也感謝大家一直以來的關注與支持，請大家多給我們一些時間，繼續期待。」
騰訊遲足三個鐘先至發聲明，搞到停播事件似係「突發」咁，網民當然鬧爆啦，「退錢！會員三個月的！為了《宮心計2》才充的，騙子騰訊，沒擔當，播不出來，之前也不出告示，搞笑。」、「不要臉的騰訊」、「不是為了看《宮心計2》才不買會員呢，騙子，騙錢，劇能延期，會員能延期嗎，垃圾騰訊，支付寶啥都免費，你們啥都收費，鄙視馬化騰！」咦，打手嚟0架……？
|
鍾意就快D Share啦！
|
|
|