掃呢頁CODE去手機

2018年5月14日 星期一

【撞名有默契啲】「父子檔」演飛虎隊 王敏奕讚老竇王敏德溫柔 __,王敏奕,王敏德,

王敏奕(Venus)同王敏德(Michael),於邵氏網劇《飛虎之潛行極戰》中飾演父女,同時都係飛虎隊員,兩人日前於中環接受訪問,雙王連中文名字相當相 ...


王敏奕(Venus)同王敏德(Michael),於邵氏網劇《飛虎之潛行極戰》中飾演父女,同時都係飛虎隊員,兩人日前於中環接受訪問,雙王連中文名字相當相似,Michael話得悉名字如此有趣,經常將此掛在嘴邊,王敏奕話:「Michael中文唔係好叻,佢知道之後覺得好好笑,話我做乜唔早啲講。」Michael當王敏奕係自己女兒,Venus於其中一次拍攝時不慎撞傷頭,要救護車即時送院,令Michael非常擔心,Michael話:「我見Venus郁唔到,好擔心,我哋拍戲唔應該咁辛苦。」

劇中演父女,但王敏奕就笑指二人關係似父子,Venus話:「我同男仔冇分別,要做飛虎隊好難,要特訓再考先入到,爸爸身為飛虎大sir,好擔心我是否可以,觀眾會驚訝佢係一個好溫柔嘅阿爸。」

Venus喺一場動作戲中不慎撞傷頭,佢話:「場戲講我要跌,點樣拍到跌而令自己唔撞傷係唔容易,可能當日拍得太長時間,到最尾先跌,跌完暈暈地,個頭腫咗同郁唔到,要即刻召救護車。」Venus表示,唔會怕咗拍動作戲,只係驚拖慢拍攝進度,武指睇過決定一take pass。Venus覺得拍動作戲受傷好正常,不過自己鍾意郁,想向動作方向發展:「男友冇俾意見,可能大家拍戲都知道,拍動作片冇跌親都唔係拍動作片,現場好多武師幫手,安全係第一,如果有都希望再嘗試動作戲,乜都會拍。」

究竟動作戲有乜咁吸引?Venus體驗過講得好有說服力:「動作戲好玩刺激,現實生活中係唔會發生,戲裏面有得開真槍,又喺1:1嘅直升機跳落嚟,非常刺激好玩。Michael揸直升機載我哋,大家合作好開心,Michael好想與時並進,唔似同一個高高在上嘅前輩合作,可以喺佢身上學到嘢,佢又會問我一啲我知嘅嘢。」

王敏德就大讚王敏奕,Michael話:「第一次見面,佢好平易近人,工作時睇到佢畀好多心機,應付動作唔易,但佢乜都可以做晒。未見過咁靚嘅飛虎女,佢應付到所有動作,見佢拍完其中一場戲撞到受傷,我好關心佢。我哋好似喺同一個家庭相處,我係王敏德,佢係王敏奕,好似自己個女,我同自己兩個女都好好朋友,關係好易溝通。」王敏德現在較少演出,佢話:「之後會多啲,今年會拍劇古裝劇,而我喺直升機公司一個月有15日要揸直升機,公司會盡量配合我演出工作。」

王敏德

服裝:Giorgio Armani

髮型:Hugo Poon @Toni&Guy IFC

王敏奕:

髮型:Ken Hui @ ii Alchemy

化妝:King Yip @KINGS MAKEUP

場地提供:FUMI



王敏德話初初唔知同王敏奕撞名,覺得名字如此有趣。

王敏德讚Venus靚女,係最靚嘅飛虎女。

劇中演父女,但王敏奕就笑指二人關係似父子。



訪問期間,兩人動作交流都好有默契。



Venus拍攝時跌傷頭,令Michael非常擔心。

但意外無令佢卻步,仲好鍾意拍動作戲,覺得好刺激。




鍾意就快D Share啦!