2018年5月6日 星期日

【網民hot talk】藍絲女神童話式再婚 天文台長讚偲嫣勁正 __,女神,

偲嫣再婚了,新郎不是我;呢位藍絲「女神」噚日(5日)正式再被「私有化」,相信唔少堆填區嘅王老五,心情都相當複雜。50有3嘅「正義聯盟」主席李偲嫣(Le ...


偲嫣再婚了,新郎不是我;呢位藍絲「女神」噚日(5日)正式再被「私有化」,相信唔少堆填區嘅王老五,心情都相當複雜。50有3嘅「正義聯盟」主席李偲嫣(Leticia),噚日下晝喺九展舉行童話式基督教婚禮,再次讀出結婚誓詞。雖然賓客唔多,大概得廿人,不過偲嫣前晚喺個人facebook帳戶貼嘅谷胸婚紗照,就吸引到差唔多600人畀like同心心,連天文台長岑智明都有畀心,讚偲嫣「勁正」呀!

原名李艷青(Lettie)嘅李偲嫣,前夫姓劉,兩個人好早已經離異,但就生咗個仔。獨守空幃多年嘅偲嫣,嚿年宣佈搵到第二春,同有港專「鋮浚哥」之稱嘅謝鋮浚(Gary)再婚,噚日下晝喺九展煌府嘅露天場地行禮。偲嫣全程着住白色婚紗、戴住冠冕,佢老公就着白色宮廷禮服,似乎想搞一場童話式婚禮喎。而佢好朋友兼前上司梁美芬,就去咗佢之後嘅婚宴。

《蘋果》讀者Bryon(化名)直擊到偲嫣下晝行禮嘅「盛況」,Bryon本身係隔籬場地嘅賓客,但因為兩個場都係露天,中間冇完全隔開,所以就見證到偲嫣變成謝太嘅一刻。Bryon話,偲嫣場婚禮歷時大約半個鐘,但佢因為擔心會俾偲嫣嘅大媽賓客發現,所以冇影足全程。但佢話,偲嫣再婚「都係開心事」,會衷心「祝福佢」最終搵到第二春。

李偲嫣可謂「一生傳奇」,有報道話佢喺1990年代,曾經做過藝人鄺美雲嘅經理人,但懷疑因為錢銀問題,解約收場,仲一度破產;25年間至少20次俾人入稟追債或索償,包括地產商新世界同TVB;近年亦涉嫌虧空公款同欠債唔還,同唔少藍絲黨友反晒面。「梁粉」彭春娥大呻俾偲嫣呃咗20萬,「佢周圍呃人錢呀,爭咗成過百萬呀……唔係女神呀,係女神棍」;另一藍絲史先生仲話,偲嫣捉住佢嘅愛國心嚟色誘,3年借咗超過80萬但唔還,鬧爆偲嫣係「殘花敗柳」、「一個仙都唔值」。

不過偲嫣近幾年嘅出位言行,仍然叫一眾fans「津津樂道」;不但高調撐國教、反同志,仲率領藍絲玩批鬥,成為撐警界「女神」。曾經批評學民3子絕食反國教係博同情嘅李偲嫣,4年前竟然走去絕食反佔中,3年前更加cosplay學生妹( https://bit.ly/2IhPGS0 ),以一身水手校服喺記者面前,大玩「跳飛機」撐警,真係少啲「勇氣」都做唔到呀。雖然佢成日俾人笑P圖功力深厚,但P圖又P到出埋「寫真集」喎,仲吸引唔少fans入貨添,點到你唔服?

《蘋果》製圖 偲嫣昨日下晝喺九展煌府行禮。

賓客唔多,大概得廿人,佢個仔同前上司梁美芬都唔覺有嚟。(讀者提供圖片)

偲嫣喺婚禮全程着住白色婚紗、戴住冠冕,鋮浚哥就着白色宮廷禮服,似乎想搞一場童話式婚禮。(讀者提供圖片)

偲嫣前晚喺個人facebook帳戶貼嘅谷胸婚紗照,就吸引差唔多600人畀like同心心,就連天文台長岑智明都畀心,話偲嫣「勁正」呀!

鍾意就快D Share啦!
Related Posts Plugin for WordPress, Blogger...