掃呢頁CODE去手機

2018年5月7日 星期一

靠邊個反擊Thanos?《復仇者4》劇情分析推測 __,復仇者4,復仇者聯盟4,

Marvel電影推出十週年,《復仇者聯盟3:無限之戰》令一眾fans屏息凝神睇到眼定定,結局更帶嚟無限衝擊,一改超級英雄電影Popcorn風格,唔少人 ...


Marvel電影推出十週年,《復仇者聯盟3:無限之戰》令一眾fans屏息凝神睇到眼定定,結局更帶嚟無限衝擊,一改超級英雄電影Popcorn風格,唔少人都好期待下集復仇者成功復仇,但係到底要點樣復仇呢?

好多人睇完戲都會問,「點解奇異博士唔用時間石…」、「又話死都要保住粒石,到最尾又送出去…」,其實電影當中已經為觀眾解釋咗,奇異博士喺開戰之前已經用過一次時間石去睇未來1400萬個可能性,當中只有一個有機會嬴,點解曾講過「如果要在時間石與你們中間選擇,我會毫不猶豫地犧牲你們。」嘅奇異博士最尾會用時間石換返Ironman條命?其實奇異博士喺自己嘅電影當中已經試過不停犧牲自己去解決對手,死亡對一個醫生嚟講並唔陌生,或者佢睇到嘅就係唯有交出時間石犧牲自己及宇宙中半數嘅人先可以激發到Ironman搵出打敗Thanos嘅方法。

電影當中鷹眼及蟻俠都未有出場,但係鷹眼喺電影海報當中曾換上新裝備登場,令到有唔少人懷疑鷹眼同埋身為今集片尾彩蛋嘅Captain Marvel會喺下集成為擊敗Thanos嘅關鍵,而另一方面,導演羅素兄弟講過早喺《美國隊長3:英雄內戰》當中已經出現過打敗Thanos嘅提示,有唔少人都猜測係Ironman喺內戰入面介紹過嘅「二元擴增回溯框架」,Ironman曾經用佢嚟重製同父母最後一次見面嘅場面,基於《復仇者》拍攝片場流出過一輯復仇者身穿舊版服裝嘅相,令到fans猜測下集可能會用同一套系統模擬同Thanos決戰嘅情況搵出解決方法,但係呢個系統能唔能夠模擬出戰鬥時嘅能力亦都係一個問題。

另一方面,唔少人都開始猜測點樣令到已經死去嘅角色復活,假設復仇者聯盟成功擊敗Thanos拎走無限手套的話,時間寶石及靈魂寶石可能會係關鍵,Marvel官方對時間寶石嘅有效期未有提出一個說法,即係有可能時間寶石可以追溯嘅時間及空間有限,令到用時間石復活失敗。

而靈魂寶石喺今集電影官方前導漫畫中,奇異博士嘅助手阿黃講過靈魂寶石係最強大嘅寶石,而喺電影中似乎又真係未實際展現出靈魂寶石嘅強大,所以化灰嘅角色有機會係被困於靈魂寶石當中,而冇化灰就死亡嘅角色除咗幻視之外好可能回天乏術。

幻視身為生化人,身體係由機械組成,好有可能喺瓦干達嘅科技下重生,而幻視作為復仇者聯盟強大嘅中員一直喺多部電影中都未有出色表現,令佢重生聯合Captain Marvel可能會成為擊敗Thanos嘅關鍵。

其實單睇死剩嘅角色,似乎未能夠喺下集長達3小時嘅電影當中製造出史詩感,部份角色嘅復活必然會成事,但係現有角色會戰死亦都非常有可能(畢竟有部份演員合約已經完成),到底復仇者4點樣完成史詩式復仇,真相真係要等下年先知喇。




鍾意就快D Share啦!