掃呢頁CODE去手機

2018年6月13日 星期三

【30歲前不停換畫】豪語婚前交過逾20伴侶 伍詠薇:我係健康乾淨寶寶 __,伍詠薇,

攝影:仇志中、廖達燊
英雄莫問出處,49歲伍詠薇近日喺合拍劇《飛虎之潛行極戰》嘅「娜姐」非常出位,佢唔介意大爆曾做邊緣少女,因為及早反省,所以冇學壞之餘,仲練就「金鋼」不壞 ...


英雄莫問出處,49歲伍詠薇近日喺合拍劇《飛虎之潛行極戰》嘅「娜姐」非常出位,佢唔介意大爆曾做邊緣少女,因為及早反省,所以冇學壞之餘,仲練就「金鋼」不壞之身。

讀書成績唔好嘅伍姑娘,89年毅然選亞洲小姐,可惜大熱倒灶得「梗頸四」,同年簽約亞視做藝員,並受力捧。89年對佢嚟講最大轉捩點,其實係喺時尚派對認識咗香港安永會計師事務所高級合夥人翁江培,當年21歲嘅伍姑娘同大佢一截嘅翁江培拍拖年多便結婚,可惜呢段婚姻僅維持咗13日,翁江培喺深圳突然心臟病發猝死,伍姑娘年輕守寡。99年才有第二春,獲黎姿做媒,伍姑娘認識咗廣告人練海棠,兩人結婚至今19年,不過去年,練海棠被周刊踢爆孔雀開屏,見慣大場面嘅伍姑娘全力護夫,為佢解圍,平息風波。

伍姑娘笑言最初加入娛圈時,都自動落保護閘:「我覺得自己壞定咗,壞人嚟都睇穿,不過呢行,一山還有一山高。」伍姑娘當然也有試過被呃,叫佢揞名爆,佢話:「壞嘅幕後多啲,呢行三山五嶽,尤其幕後人嚟自唔同階層,幸好我性格好嬉戲人生,啲人如果想對付我、想去跣我、害我,我就嘻嘻哈哈,佢哋咪唔知我真傻定假傻,加上我傻人有傻福,最後立心不良嘅人就放棄搞我,不如換去搞個乖啲、搞個蠢啲,我就冇事。」

「以前做嘢耐咗,我發現根本有啲人想『棟』你,或想介紹啲人『交易』, 我都後生過靚過嚟,但我唔好嗰啲,唔啱我,因為我自尊心好強,幾男人性格,如果我行錯就會一世被人唱,我硬頸,所以我咁耐以嚟,個底唔花,冇啲核突嘢,只係有一次畀傳媒捉到我同有婦之夫。」伍姑娘當年喪夫,因為芳心寂寞才不計名分戀上人夫,這場沒名份戀愛暗交4年,伍姑娘醒覺後單方面提出分手,有指佢相約對方太太見面並斟茶認錯,幸好最後就遇上現在丈夫練海棠,夫妻間互相尊重。

伍姑娘選美至今,保養得宜,被稱做「伍索」,佢得戚話:「我咁啱姓伍啫,你叫我『伍筒』都得。」問佢初戀,佢話:「拖手去睇戲嘅puppy love唔計,我18歲先正正經經正式拍拖。」佢仲自爆由girl變woman:「18歲先變『成熟』,其實我好怪,可以好壞、好癲,不過我又有底線,啲人捉唔到我,以為我玩得好癲,呢個女仔好容易『hoho』,我又『hoho』番你囉。」問到伍姑娘成為練太前,到底有過幾個男友,佢話「十隻手指數唔晒」,即使記者借埋對手,佢話都唔夠,佢最後計翻條數:「有啲fb撞番,點解咁熟口面,有啲唔記得,但我真係無聊數過,都有20幾個㗎。」伍姑娘30歲時再婚嫁畀練海棠,但嗰時截數,唔計散拖,佢都交往過20多個男友,換畫都好神速,伍姑娘強調:「但係我冇病,我好乾淨,係健康乾淨寶寶。」

伍姑娘明年就入「伍」,活到今天,半百人生如同坐過山車,去年又為老公「洗底」,伍姑娘都樂觀笑談:「其實個天畀咗好多嘢我,我真係冇扮開心,你有留意都會知我性格係咁,如果唔係咁,頂唔到咁耐,我全部嘢都可以公開,事無不可對人言。上天畀咗好多安排我,呢啲安排我全部受晒,即使重新『洗牌』都唔想預知,唔知情況下過你嘅人生最好,唔知幾歲發生乜嘢,係好刺激,我係一個explorer,好肯嘗試,唔可以係你安排我,上天安排得,當中一定有message。」

「如果一百歲,我人生差唔多一半,問我夠未?各方面,貪心唔嚟,有啲嘢天時地利人和,有啲嘢睇機會,講運氣,生命中有一個多人記得嘅角色,係對我演技嘅肯定,攞唔攞到乜嘢獎都係錦上添花。今日我有婚姻,有我最愛嘅貓同自己事業、有我哥哥同佢哋個family,我要求好簡單。父母已唔在生,如果ready隨時要我走,我即走,拜拜,無後顧之憂,我係一生何求。」

伍姑娘話:「我唔係灰,每個人性格都唔同,我見過、玩過,享受過嘅嘢已經好足夠,唔好咁長命,我怕瀨屎瀨尿冇人同我執,我老公,佢應該騎鶴...哈哈」伍姑娘真係百無禁忌乜都敢講,講完出口,佢都覺得「過火」,立即鏡頭前自我掌嘴,佢再話:「梗係佢長命啲啦,佢要照顧我,練海棠,你長命啲呀,佢要照顧我,我盡量唔瀨」

場地:麵館

精選娛聞,喺晒《娛果》

http://fb.com/appledailyent

攝影:仇志中、廖達燊 49歲伍詠薇近日喺合拍劇《飛虎之潛行極戰》嘅「娜姐」非常出位。 49歲伍詠薇近日喺合拍劇《飛虎之潛行極戰》嘅「娜姐」非常出位。
伍姑娘笑言最初加入娛圈時,都自動落保護閘。

伍姑娘笑言最初加入娛圈時,都自動落保護閘。
伍姑娘當然也有試過被呃,佢話:「唔知我真傻定假傻,加上我傻人有傻福。」

伍姑娘當然也有試過被呃,佢話:「唔知我真傻定假傻,加上我傻人有傻福。」
經歷咁多事,伍姑娘都樂觀笑談:「其實個天畀咗好多嘢我,我真係冇扮開心。」

經歷咁多事,伍姑娘都樂觀笑談:「其實個天畀咗好多嘢我,我真係冇扮開心。」
伍姑娘話:「我享受過嘅嘢已經好足夠,唔好咁長命,我怕瀨屎瀨尿冇人同我執。」

伍姑娘話:「我享受過嘅嘢已經好足夠,唔好咁長命,我怕瀨屎瀨尿冇人同我執。」

鍾意就快D Share啦!