95年港姐冠軍楊婉儀，日前佢同老公王帥勳任職董事嘅薩摩亞註冊公司Little Einstein Academy Limited，遭本港財務公司淼鼎資本有限公司入稟，指楊婉儀嘅公司先後從原告獲得240萬貸款，並以楊婉儀嘅后冠及加州物業作還款抵押。不過佢老公婆還咗兩期數後，拖延還款，又唔肯簽文件交出后冠同物業，至今連本帶利被追討376萬。
連日來楊婉儀未有現身解話，本身佢係「慧妍雅集」信託委員會主席，每個月都要出席兩次例會。有報道話楊婉儀上星期仍如常去開會，當時冇乜異樣，直至被淼鼎資本有限公司入稟追數，佢就向「慧妍雅集」信託委員會請假，據知佢話因為要處理私事，暫時出席唔到會議，就由信託委員會副主席曹敏莉代為處理。
雖然楊婉儀暫時冇影，不過佢都有向「慧妍雅集」班好姊妹報平安，仲叫大家唔好擔心，曹敏莉仲話好清楚佢嘅為人，希望佢快啲處理好件事，而向海嵐都係委員會成員，佢就話楊婉儀雖然缺席會議，但用電話開會，會務冇受影響，運作如常。至於楊婉儀自己就曾發訊息回覆傳媒表示多謝關心，佢自己要了解吓，依家件事進入咗司法程序，唔方便講咁多。
楊婉儀7年前就同老公王帥勳開辦教育中心，曾於2014年與人合資千萬開辦Golden Gate國際幼稚園暨幼兒園，不過佢同拍檔有爭拗，引來錢債官司。好似去年2月，楊婉儀被追187萬；到去年9月佢間幼稚園又被討3萬元員工強積金；到今年3月幼稚園就執咗。
其實楊婉儀兩公婆今年3月，仲有出席東華三院嘅就職禮，五月佢自己就現身「慧妍雅集」籌款晚宴，當時冇乜異樣。至於佢個后冠，係真鑽石，佢個年係首位港姐冠軍獲真鑽石后冠，加埋權仗同袍扣，估計值百幾萬。
|
鍾意就快D Share啦！
|
|
|