網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年6月25日 星期一

視像電話夾歌 陳家樂爆林夏薇唔啱beat __,林夏薇,陳家樂,

視像電話夾歌陳家樂爆林夏薇唔啱beat因為劇集《逆緣》而人氣急升嘅「爺爺」陳家樂、林夏薇等劇中主角噚日(24日)喺小欖燒烤場同fans們搞咗個BBQg ...


  • 視像電話夾歌 陳家樂爆林夏薇唔啱beat


  • 因為劇集《逆緣》而人氣急升嘅「爺爺」陳家樂、林夏薇等劇中主角噚日(24日)喺小欖燒烤場同fans們搞咗個BBQ gathering,順便同埋劇組台前幕後嘅工作人員聚一聚。近二百個fans無懼三十三度高溫,一早到場燒定嘢食等偶像出現。

    兩位主角到場後,就即刻開始同fans玩遊戲,家樂同薇薇分成兩隊,二人分別抽出兩位fans,然後用身體唔同部位同fans夾氣球,一分鐘內喺指定嘅路線來回得最多次嘅一隊就為之贏午家,家樂一隊抽到用手踭同面夾氣球;薇薇一隊就抽到背脊同手踭,最後竟然被着住四吋高踭鞋嘅薇薇一隊跑贏;第二個遊戲,家樂同薇薇繼續分隊同各自抽出fans,然後矇住fans對眼,二人混喺fans堆入面然後大叫被矇住眼嘅fans,fans就要靠聽聲去搵番佢哋出嚟,雖然現場嘈到飛起,不過最終佢哋都聽到家樂同薇薇嘅「呼喚」, fans們行到佢哋面前時,家樂同薇薇仲即刻上前攬實fans,羨慕到其他fans「we嘩鬼叫」。

    除咗同fans玩遊戲,曾經參加過新秀歌唱比賽嘅家樂當日仲帶埋結他嚟同薇薇自彈自唱,唱歌前,薇薇分享咗佢哋前一晚夾歌嘅趣事,「由於大家都忙,約唔到出嚟綵排,我哋係用視像電話夾,佢話不如我彈你就唱啦,數三二一,佢話:『你慢咗入啦。』我話冇理由吖,呢首歌我都算幾熟,跟住佢話再嚟過,又數四三二一,佢話:『你又慢咗。』我話有冇搞錯呀,點會慢咗呀,我話:『不如你同我一齊同時唱啦。』四三二一,我聽到嘅係同佢係同時唱,但係佢聽到我又係慢咗一拍,原來佢個電話係delay㗎!哈哈!」然後就唱出《小幸運》。之後就輪到家樂solo謝霆鋒嘅《別來無恙》,原來佢已經有兩、三年冇拎住結他公開唱歌,「嗰陣時一直都有練,但呢兩、三年都冇練,所以今次都有啲緊張。」咁為咗呢次演出之前練咗幾耐?佢話只係之前一晚練一練,「因為之前一路都要開工,冇時間拎起支結他,所以我同薇薇都係喺電話度夾,但原來電話係夾唔到歌㗎,會有delay。」問到點解唱《別來無恙》,佢就話:「主要係因為以前有玩過呢首歌,比較熟個譜同歌詞,唔需要練太耐,哈哈。」另外,當日fans仲送上蛋糕,為今個月30號生日嘅薇薇慶祝生日,仲全場大合唱生日歌㖭。

    今次聚會咁成功,原來家樂之前勁擔心,「因為真係未試過,我係好緊張、好擔心可能得十零人,仲要有一半係工作人員,哈哈。結果上個禮拜同事同我哋報喜,人數已經過咗一百人。結果今日嚟到好開心,真係超級多人,好熱鬧。」薇薇就話估唔到咁多海外fans,「真係估唔到,除咗香港嘅fans,仲有好多海外專登買機票飛嚟香港支持我哋,有馬來西亞、新加坡、仲有啲內地嘅朋友,一齊玩。」之後仲話:「其實我估唔到我嘅第一次fans聚會會係同陳家樂一齊搞,因為之前都未諗過要搞粉絲聚會,原來好好玩好熱鬧㗎。」

    鍾意就快D Share啦!