6月28日播出的《深宮計》劇透！主要情節有四：甘若芊受罰，因禍得福；李隆基越發懷疑皇后王蓁；太平公主發現仲有位嫡系皇子失蹤，但未想到何離身上；鄭昭儀有喜，皇后臉色有異被李隆基察覺。
【甘若芊受罰，因禍得福】
甘若芊自上手銬，由玲瓏公主帶到眾人面前下跪認罪。其實睇得出場上人人都知甘若芊並唔係始作俑者，所以太平公主刻意留難，話要嚴懲處置以儆效尤，理應處斬，真係嚇到任三恕個心離一離呀！好彩有玲瓏公主、鄭昭儀甚至淑太妃幫口，所以李隆基立即結案，罰甘若芊廷杖五十。甘若芊被打到吐血，但佢反而笑騎騎話「因禍得福開心又滿足」，事關學玲瓏公主話齋：「用五十大板換咗個心上人返嚟。」
【李隆基越發懷疑皇后王蓁】
李隆基眉頭深鎖，而心事亦被何中郎睇穿，知道陛下懮心嘅原因係皇后。李隆基亦好坦白：「以前我瞞騙天下人，都唔會對皇后加以隱瞞，但如今我唔知佢一句關心係唔係另有他意，我唔知佢笑容之下係咪暗藏心計，我竟然要對住我朝夕相處嘅枕邊人隱藏本心。」隱約透露出鄭昭儀同任三恕被屈有染一事，李隆基心底裡係懷疑王蓁，所以為顧全大局先犧牲無辜嘅甘若芊。
【太平公主發現仲有位嫡系皇子失蹤】
太平公主一黨發現，當年臨盆在即嘅劉皇嗣妃被送到亂葬崗時，腹中並無胎兒，反而多咗一條剪過嘅臍帶，而初生嬰兒更係生不見人，死不見屍。因此，太平公主想致力搵出呢個失咗蹤嘅嫡出皇子，去威脅李隆基嘅地位。
【鄭昭儀有喜】
皇后王蓁一直為生唔到仔而煩惱，所以聽從文太醫嘅建議，用樹藤拍打身體，希望透過呢啲自殘自傷行為，重新令久滯不通嘅經脈再次運行暢通，仲話：「我一定可以再有孩兒。」點知與此同時，傳嚟鄭昭儀有喜消息，佢更親眼見到、親耳聽到李隆基極開心咁攬住鄭昭儀話：「實在太好喇！我哋終於有我哋嘅孩兒，我要做父親喇！」
太上皇得知消息後好開心，亦好識做人，先送名貴禮物俾王蓁，又讚佢管理后宮做得好，氹到王蓁笑騎騎，點知轉個頭太上皇就送自己收藏多年嘅寶貝俾有喜嘅鄭昭儀。王蓁面色即變，得咗，仲被李隆基發現佢神情不善添。
來源 source: http://nextplus.nextmedia.com
|
鍾意就快D Share啦！
|
|
|