雖然不是貧賤夫妻，但吳博君患病後跟太太都沒再工作，手停口停，問到經濟能力有否問題？博君坦言：「有，自己做唔到嘢，後來太太辭埋份工，真係完全冇收入，我太太諗起演藝人協會，打電話將情況講畀演藝人協會聽，後來協會聯絡咗麥包（麥長青），演藝人協會應承幫我哋少少。佢哋去醫院探我，我當年訓練班同學，冇聯絡嘅都湧晒出嚟探我，好似魯振順、湯鎮業、劉少君……真係走嚟醫院探我，廿三年冇見過！」
得人恩果千年記，博君眼紅紅、聲震震說：「喺呢度我特別多謝薛凱琪。我唔識佢，佢私人捐咗少少錢畀我，雖然唔多，但都係一番心意，我唔明點解有人咁好，原來有人真係好好㗎，人間真係有情，以前都唔係好覺，依家好覺。藝進會好多同學知道，有捐錢畀我，藝進會邊個捐助我幾多，有張清單，睇到劉德華都有捐，大家都好有心，好多謝佢哋，人情債唔知點還，只能講真係多謝佢哋。」
曾在無綫拍過多部劇集的博君，與華仔合作很多，他笑說：「佢好百厭，諗番好多回憶，大家好好同事，最記得佢拍《獵鷹》，佢做差人我做賊，佢拉咗我，喺沙田大坑渠打一大輪，成身污糟邋遢，大家一齊返去沖涼，諗起幾過癮，佢冇架子，只係百厭啲。」
除了演藝人協會和藝進同學會捐錢外，原來博君的前任老闆，對他亦有情有義：「患病前最後嗰份工好輕鬆，因為我年紀有番咁上下，喺一間公司做清潔雜務，有少少收入又唔辛苦，做得幾開心，公司對我非常之好，我已經冇做、入咗安老院，老闆應承每個月津貼我五千蚊費用，為期兩年，我都嚇咗一跳。」他哽咽說：「世間上竟然有咁好嘅人，我真係估唔到，我依家返咗屋企，唔需要佢幫，但我好多謝佢。原來好多人對我好好，同學全部湧晒出嚟鼓勵我：『畀啲心機努力，唔好放棄！』真係好開心，我由一個好絕望，變番充滿希望嘅人。」
精選娛聞，喺晒《娛果》
http://fb.com/appledailyent
| 人間有情，吳博君患病後，不少同期藝訓班同學前往醫院探望。（受訪者提供圖片） | | |
| | | |
|
鍾意就快D Share啦！
|
|
|
