33歲嘅戴夢夢，2015年驚爆做第三者、搭上大佢19年，52歲嘅人夫太極樂隊鼓手朱翰博（Ricky），最終令Ricky同老婆離婚收場。成功搶人老公嘅戴夢夢，舊年6月被發現背住Ricky，攬住五星級酒店品酒師莊炳森喺澳門賭場賭錢，兩人態度親暱。當時Ricky得知事件後，面對傳媒查詢初時支吾以對，收線30分鐘後，再向傳媒表示同戴夢夢已分手幾個月，仲打探嗰男人係咩人，甚有醋意。
估唔到當時事隔4個月，夢夢同Ricky又翻撻番，真係癡男怨女。
呢對忘年戀復合都有大半年，日前見佢哋喺天后出現，Ricky負責揸車去到大坑附近停底車，戴住黑超嘅夢夢就一個人落車，行番去天后方向。見白色T恤，短牛仔褲透黑bra嘅夢夢，睇落身形圓潤咗，發福不少。沿途夢夢除咗副黑超，戴上口罩行去附近一間藥房，見佢喺藥房左揀右揀，揀咗牙膏、沐浴露等等嘅日用品，揀咗成十分鐘先至去俾錢，但佢冇攞袋日用品。
原來夢夢再去另一間舖頭，買咗排盒裝檸檬茶，之後先至行番去藥房攞袋日用品，再行去附近嘅麵包店買麵包。買完麵包夢夢就攞住兩袋嘢同麵包，行番去Ricky間車度，夢夢同Ricky雖然未結婚，不過夢夢呢個買嘢look，好有師奶feel。
期間Ricky落過車透吓氣，後來夢夢行番嚟，佢先行去Ricky司機位講咗幾句，先至行番去旁邊位上車。夢夢兩隻手都攞住嘢，但Ricky全程冇諗過落車幫手，上到車夢夢除咗口罩，同Ricky傾咗一陣，就開車走人。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|