2018年6月9日 星期六

娛樂專題:TVB御用阿媽逐個捉 邊個狠心邊個惡毒? __,TVB,

真係入型入格呀!無綫劇集向來深受觀眾歡迎,唔少藝人因為形象太深入民心而奠定咗之後嘅戲路,間接造就咗好多御用演員,好似「御用奸人」鄭子誠、「御用強姦犯」 ...


真係入型入格呀!


無綫劇集向來深受觀眾歡迎,唔少藝人因為形象太深入民心而奠定咗之後嘅戲路,間接造就咗好多御用演員,好似「御用奸人」鄭子誠、「御用強姦犯」李天翔等,當中仲有一班「御用阿媽」,佢哋個個都「兒孫滿堂」,仲各有各嘅特色添!

韓馬利 最狠心媽媽

韓馬利雖然表面好似個普通嘅小女人,但原來佢非常狠心,喺12年入面先後喺不同劇集中,合共拋棄10個親生仔女,分別係劇集《智勇新警界》以及《洪武三十二》嘅馬德鐘、《衝上雲霄》嘅吳鎮宇、《甜言蜜語》嘅徐子珊、《囧探查過界》嘅鍾嘉欣、《On Call 36小時》嘅楊怡、《幸福摩天輪》嘅陳智燊、《法網狙擊》嘅森美、《情逆三世緣》嘅關詠荷同《師奶MADAM》嘅蕭正楠,當中馬德鐘仲要慘被拋棄兩次,難怪韓馬利獲封「最狠心媽媽」。

謝雪心 最縱容仔女媽媽

謝雪心喺劇集《巾幗梟雄》入面奸到出汁,仲因為咁而勇奪「最佳女配角」。但其實劇中嘅謝雪心係一位慈母,佢壞事做盡都只係為咗保護仔仔敖嘉年,而佢之後亦多次喺不同劇集中「寵仔寵出禍」!其中最令人印象深刻嘅,就係佢喺《法外風雲》入面任由仔仔王浩信做遊手好閒嘅富二代,王浩信仲衰到吸毒兼強姦,好彩謝雪心最後醒覺,上演怒摑對方23巴嘅經典一幕。

李司棋 陳展鵬御用阿媽

李司棋嘅好媽媽形象深入民心,佢喺劇集《真情》同《溏心風暴》入面都因為飾演好媽媽而大受歡迎,其中《溏心風暴》更令佢奪得「最佳女主角」。不過講到李司棋做阿媽嘅代表作,必定係「陳展鵬御用阿媽」,事關佢分別喺劇集《心路GPS》、《巨輪》及《叛逃》入面飾演陳展鵬嘅媽媽,而佢同陳展鵬喺《心路GPS》中經常有親密兼冤氣嘅互動,令網民笑稱佢哋係「母子戀」。

馬海倫 最惡毒阿媽

馬海倫喺劇集入面多數做惡人角色,就連自己嘅仔女都一樣唔放過。好似喺劇集《金石良緣》入面,馬海倫長期留難繼女鍾嘉欣,仲搞到大打出手。之後佢亦分別喺《心戰》、《真相》等劇飾演惡媽,而近年最多人討論嘅,就係佢喺《心理追兇 Mind Hunter》入面,不斷用言語暴力、甚至虐打仔仔何遠東,最終何遠東忍受唔住壓力而誤殺咗佢。

盧宛茵 最奄尖阿媽

做阿媽嘅當然想自己嘅仔女可以生活無憂,而盧宛茵就經常喺劇集入面,化身尖酸刻薄嘅奶奶或者外母,搞到一班主角不知所措。佢喺劇集《戇夫成龍》入面,為咗保護智力有問題嘅仔仔郭晉安,成日刁難新抱宣萱,喺《女王辦公室》又為咗仔仔陳山聰而同家嫂呂慧儀爭風呷醋,喺《性在有情》入面更嫌未來女婿張兆輝襯唔起囡囡陳敏之而出手拆散佢哋。盧宛茵嘅刻薄形象仲衝出電視圈,佢為一段網絡潮文拍攝短片,飾演嫌未來女婿住公屋嘅外母,認真入形入格。

陳秀珠 最冇子女緣阿媽

陳秀珠雖然經常喺劇集中做人阿媽,但有好多仔女都不約而同地同佢不和,當中包括《師奶強人》嘅李克勤、《酒是故鄉醇》嘅馬德鐘、《戇夫成龍》嘅宣萱、《青出於藍》嘅周永恒、《我的如意狼君》嘅姚子羚及龔嘉欣、《心路GPS》嘅陳展鵬、《警犬巴打》嘅鍾嘉欣同埋《雜警奇兵》嘅黃智雯。不過現實中嘅陳秀珠獨力湊大仔仔陳迪加,二人嘅感情仲好好添。


來源 source: http://hk.on.cc
鍾意就快D Share啦!
Related Posts Plugin for WordPress, Blogger...