《深宮計》嘅對白入面成日有句「多行不義必自斃」。嚟到第33集（7月4日星期三晚播），三番四次陷害周秀娜嘅胡定欣，終於紙包唔住火，做過嘅衰嘢被娜姐同劉心悠知道晒喇！到底娜姐係點樣識破定欣嘅惡毒呢？原來係貫徹《深宮計》敘事手法，繼續由涉事角色爆響口講晒啲犯事經過出嚟。
話說定欣心腹醫工──茗風，被娜姐識破佢就係喺紫蘭湯外大叫「有刺客」，從而老屈娜姐同馬明有姦情嘅假宮婢。茗風被娜姐威嚇兼用髮簪狠狠插咗一嘢後，乖乖講出紫蘭湯一事嘅真相。之後茗風仲誇張過食咗哆啦A夢誠實豆沙包，喺無人問佢嘅情況下，自己自動自覺將定欣陷害娜姐嘅所有重點經過，一五一十自爆出嚟，包括「火燒藏書閣」、「石擊甘若芊」、「金鵲害滑胎」。對於呢種交代情節嘅「高明」手段，相信觀眾已經「彈」到口水都乾埋，反正仲有幾集就完（共36集），睇開啲啦，而且終於等到多行不義嘅定欣快要被斃，真係越諗越大快人心。
另外，唔少人都話劇中嘅娜姐演技麻麻，但就喺佢同定欣對質嘅一幕戲當中，相信大家都會改觀！佢嗰種對眼前仇人不能除之而後快嘅不甘、怒火，以及此仇不報誓不罷休嘅決心，溢於言表。
- 娜姐識穿茗風假扮宮婢嗌救命。
- 娜姐用髮簪狠狠插咗茗風一嘢。
- 茗風乖乖講出所有真相。
- 娜姐搵胡定欣對質。
- 茗風見風轉舵，再幫胡定欣屈返娜姐轉頭。
- 娜姐嬲到眼都凸。
- 娜姐最後又不甘心到喊出嚟。
來源 source: http://nextplus.nextmedia.com
|
鍾意就快D Share啦！
|
|
|
