馬國明同黃心穎拍拖後不時放閃，加上馬國明已經44歲，唔少人都好關注佢哋嘅婚期。噚日有報道指曾經講過婚後會繼續同父母住嘅馬國明，喺女友黃心穎嘅洗腦之下，開始打消呢個念頭，仲努力儲錢再買樓，婚後同父母分開住。報道仲話馬國明為心穎轉形象，買過晒啲衫褲，而且仲豪花20萬買情侶戒，仲有傳聞指馬國明媽咪有微言。
噚日馬國明否認報道：「其實除咗真係要努力儲錢之外，全部嘢都唔係真，我哋暫時都未有結婚呢個話題，始終佢仲係好年輕，仲想喺事業上先衝刺一下，所以暫時未有呢個話題。」
儲錢保障家人
馬國明仲解釋，儲錢係為咗保障自己同屋企人：「咁辛苦搵啲錢番嚟，起碼唔好令佢貶值，最少都可以抗到個通脹，所以一定儲錢。再加上我哋呢行冇乜保障，所以咪要保障吓自己，如果儲到錢，咪再去做吓啲穩陣嘅投資，為咗自己同屋企人將來嘅保障！」至於心穎都話：「冇啲咁嘅事，多謝關心。」
撰文：馮仁昭
來源 source: http://hk.entertainment.appledaily.com
|
鍾意就快D Share啦！
|
|
|
