2018年7月12日 星期四

密謀獨霸頻洗腦 黃心穎誘馬國明棄母 __,心穎,馬國明,黃心穎,

黃心穎
密謀獨霸頻洗腦黃心穎誘馬國明棄母馬國明與黃心穎拍拖逾兩年,由了解中進化成了解咗,在剛播完的《宮心計2深宮計》中飾演苦命鴛鴦賺人熱淚,鏡頭前後都攞正牌拍 ...


密謀獨霸頻洗腦 黃心穎誘馬國明棄母



馬國明與黃心穎拍拖逾兩年,由了解中進化成了解咗,在剛播完的《宮心計2深宮計》中飾演苦命鴛鴦賺人熱淚,鏡頭前後都攞正牌拍拖。出名係孝順仔的馬明,與心穎拍拖初期曾承諾婚後都會與母親及家人同住,深信婆媳關係一定冇問題。但從來不愛拘束的心穎如同一匹野馬,為進一步獨霸馬明,不惜日夜進行洗腦,得咗!

為迎合心穎,馬明打扮愈來愈young,多年來慳家本色不再,早前更花約20萬買了一對訂情鑽戒與心穎齊齊戴,深知妻母同住的夢想難兌現,最近更放風表示要結婚就要儲錢另築愛巢。黐家多年的天然呆馬明,終於被心穎徹底融化,44歲都係時候獨立,為成家立室做好準備。

撰文:東方新地|圖片:新傳媒圖片庫、





黃心穎 馬國明 婚後二人世界

馬國明與黃心穎的戀情由撲朔迷離發展到現在打風都打唔甩,其實都經過多次考驗,去年有指女方打入富二代圈子一心釣金龜,同時對馬明暧昧若即若離,更因爲二人多次在公開場合避忌唔合體又話好耐冇見而傳分訊,當時直腸直肚的馬明話:「除非結婚或分手,否則唔需要交代。」不過近半年關係突然變親密,一月去完荷蘭歐遊返港,馬明約心穎歎法國菜慶生,又出席黃家爲心穎搞的生日飯,二人感情進步神速。

馬明16年以1,960萬元買入太古城頂層連天台單位與父母及一姊同住,據知主人套房被他佔用,而他亦曾揚言婚後會與父母同住,不過最近他開始轉口風,聲言會為結婚再另買愛巢。



妻母同住夢碎

有指近得物質主義的心穎多,慳足半世的馬明為冧女友願意放血式揈錢,轉換形象買衫褲鞋襪已花費一大筆,平時拍拖食飯行街買嘢都好奢侈,馬明認為這樣可以與心穎拉近距離,有傳馬母因而對心穎有意見。據知情者透露,「馬明出名係慳佬,以前賺錢都畀晒阿媽管,佢唔捨得花錢,依家唔同晒心穎唔貴唔買,成日都帶馬明去睇名牌嘢,兩個月前先買咗對成20萬嘅法國名牌情侶鑽戒,馬明都肉痛㗎!不過心穎好鍾意,又話依家戴住情侶戒先,遲啲再去揀訂婚同結婚戒指,心穎肯提結婚喎!馬明聽完仲唔冧爆咩?不過心穎覺得最大嘅阻力就係未來奶奶,因為馬明一早就公開話要婚後同屋企人一齊住,心穎係醒目女,當然唔會正面對抗,佢只係不停向馬明洗腦,話有時拍完劇放工返屋企都想寧靜地休息吓,兩公婆喺屋企有自己嘅天地,煮吓嘢食睇吓電視,又話如果屋企成棚人就唔係幾方便,久而久之馬明都覺得心穎講得有道理,所以開始打消婚後同屋企人住呢個諗法。」

馬明為人孝順,多年來甚黐家,更曾被本刊記者影到與家人一起做義工,著背心搬貨。


安排婆媳飯局

44歲的馬明仍與母親及家姐同住太古城,他是孻仔,上有一對孿生家姐,多年來孝順仔形象深入民心,不時挽實母親手臂行街,對於乖仔突然向外表示要儲錢買多層樓築愛巢,意味住會在婚後棄母與老婆過二人世界,據知馬母雖然有少許失望,但她明白到兒子終有一日要成家立室,最緊要是找到合適的伴侶,見到馬明拍拖拍得開心,馬母亦開始接受心穎。對於安排母親與心穎食飯見面,馬明曾在訪問中表示心穎形象健康,母親見過心穎後反應很好,又表示父母對他搵女朋友沒有特別要求,「女仔斯斯文文、簡簡單單,父母就ok,最重要係我鍾意,我父母對佢印象幾好。」

黃心穎

6月7日心穎與胡定欣一同出席《深宮計》宣傳活動,一個是馬明現任,一個是舊愛,難得兩女並無芥蒂,好好傾之餘仲一齊派禮物畀老人家。


心穎出道六年多次被指機心重向上爬,但在馬明眼中卻是個簡單的女友,可見他已經中晒心穎毒,情人眼裡出西施。其實心穎唔止私底下以二人世界利誘馬明,早前更公開表示拍完《深宮計》令她有所領悟,要愛得及時,所以現實中更珍惜馬明,更隨時準備嫁人,不抗拒閃婚,不過馬明解釋:「佢最近好多劇要拍,可能覺得辛苦先咁樣講。」被追問何時拉埋天窗,馬明表示29歲的心穎仍年輕,仍想在圈中搏殺,未想咁快結婚生仔,但他說婚後一定會生小朋友。



返家等馬明

未有愛巢可以讓馬明心穎過二人世界,他們除了外遊,拍拖節目就只有行街睇戲食飯。6月7日心穎出席《深宮計》活動,當日馬明因離港拍劇未有現身,心穎於活動後由公司保母車送返家,到傍晚時份,馬明突然駕車出現心穎寓所樓下,未幾心穎落樓開心跳上車,二人去九龍塘又一城拍拖,撐完枱腳直落行街睇戲,期間見二人同戴之前買的20萬法國名牌Boucheron訂情鑽戒,而心穎所穿的波鞋亦出自名牌Balenciaga,價值七千幾元。二人在打扮上絕對是襯到絕,馬明看上去亦年輕不少,不過他似乎不太習慣戴住大大隻戒指,後來在停車場發現本刊記者,更刻意把手插入褲袋,不想讓情侶戒曝光。為冧心穎投其所好都係想令女友開心,睇嚟馬明都盡晒力,希望佢嘅付出好快就有收成

黃心穎

當日宣傳活動結束後,心穎先返回藍田寓所,至傍晚6時許她再步出,而馬明的座駕早已泊在其屋苑樓下等她。


撲返港陪女

只見心穎心心眼跳上馬明的Benz,二人向拍拖目的地又一城進發。其後馬明向本刊記者表示,當日下午才由內地返港,即揸車去接心穎出街。



勝利姿態出巡

有馬明護花行街拍拖,身穿工人褲的心穎以勝利者姿態出巡,邊行邊講春風滿臉的仲有事業愛情兩得意的馬明。



深情對望

馬明最近接受訪問為天然呆平反,他強調自己不是悶人,他會花心思,對女友很有情趣,所有節日都會上心。這日二人不時深情對望,睇嚟馬明真係識冧女喎!



拍拖愛做的事

食好西

馬明帶心穎到又一城內一間老牌西餐廳食晚飯,雖然冇訂位要等一陣,但心穎都冇怨言。



行街shopping

食飽飽行街睇精品,馬明同心穎一齊揀遮,有商有量好合拍。



20萬訂情鑽戒

最後心穎買咗少少精品同環保口罩,馬明識做地畀錢同拎戰利品。就係呢個時刻,二人被發現戴上情侶鑽戒,這對鑽戒出自法國品牌BOUCHERON的QUATRE系列,冇鑽石都閒閒地要7萬一隻,馬明同心穎兩隻都鑲滿鑽石閃爆,價值約20萬一對。



入場睇戲

心穎為拍拖日做好準備,一早在網上買定飛與馬明入場睇戲,自助出票後即孖住入場。



含春彈開

睇完戲在又一城停車場發現記者,本來並肩而行的二人突然彈開幾個身位,馬明一臉尷尬,仲將戴住情侶戒的手指公插入褲袋,而心穎就含春甜笑。



馬明對住心穎除了有情趣唔係天然呆之外,原來仲好有風度,識得幫心穎開車門。



各自返家

離開又一城後,馬明先送心穎返回藍田寓所,自己再經東隧返回太古城寓所,冇愛築落腳惟有各自歸家。



了解期完結

16年馬明與心穎被爆撻著,即使多次被斷正約會,二人依然矢口否認戀情,只表示在了解中,隨住去年拍《深宮計》,二人日見夜見又去橫店拍外景,感情大躍進。雖然期間曾有傳心穎有離心,但最後都是情歸馬明,戀情愈見明朗化。

黃心穎

今年一月馬明心穎相約歐遊,影了不少照片放上社交網,雖然冇發放甜蜜合照,但從單人照中可看到心穎開心幸福的笑容。


心穎今年一月與家人提前到尖沙咀1881慶生,當晚全家影合照,馬明亦在內抱實二家姐個細B,可見馬明早已融入黃家。


黃心穎

心穎今年29歲生日,在IG上載一張寫有「Happy Birthday Sum Wing BB」的單人照,之後黃長興玩「踢爆」晒出三人自拍照,相中馬明與心穎臉上同樣流露甜蜜表情,罕有地高調放閃。


早月《學是學非》好姊妹湯洛雯生日搞party,心穎亦帶埋馬明出席,感情已穩定到一個點。


黃心穎

心穎性格豪邁奔放,平時亦視性感打扮如無物,日前為《深宮計》點擊率創佳績找數,在IG公開三點式泳衣照,事前不知情的馬明睇到「嘩嘩聲」,唔知點回應記者好。


生仔重任

心穎喜歡小朋友,對二家姐的三個仔女更是疼愛有加,而馬明亦表明婚後一定會生B,呢個重任心穎應該走唔甩。



馬國明:最愛繑著媽媽手臂行街

馬明用情專一又好仔﹐曾經講過自己係好顧家嘅人,一切以父母為大前提,搵女友首要條件都要與家人相處融洽,婚後亦希望和家人同住。而到現在他仍很喜歡繑著媽媽的手臂行街,馬明曾說過:「12、13歲時怕被笑不成熟而不敢繑,其實只有不成熟才會怕。」但原來馬國明年少時把屋企看成酒店看待,回家不是吃就是睡。直至移民加拿大,全家只得他一個男丁,責任感才慢慢培養而來。

馬國明

馬明雖然劇接劇,但一有時間這個乖仔就會陪伴母親,早年馬國明曾經講過:「我喜歡繑住阿媽行街,十二、三歲時有幾年無繑,怕人家以為自己不成熟,會怕,即是才不成熟。」


曾為名牌衫鬧母親 後悔爆喊

馬明說令他至今難忘的一件事,是馬媽媽不小心把他一件名貴T恤混在其他衣服一起洗,結果染了其他顏色,當時馬國明好惡地鬧媽媽,之後更不理睬她,後來馬明見到媽媽跪在浴缸旁,用心地嘗試用手洗淨那件染了色的T恤,這畫面令他後悔中不禁落淚。畢竟衣服只值千多元,但媽媽卻不是用錢可以買到的!

馬國明

馬明當年初戀在加拿大讀大學時發生,因為女友要去多倫多讀書,雖然馬國明想過跟女友一起去,但因爸爸做太空人留在港工作,而兩個姐姐已在另一個埠讀書,馬國明想到得媽媽一個女人孤伶伶在家,怕她寂寞,所以最後決定留在溫哥華讀書,和女友相隔兩地,結果初戀維持約一年便無疾而終。


為父母 豪擲$2000萬買複式單位

馬明長大後樸實又慳家,出道頭幾年一直冇買車,也甚少搭的士,多數會由住處搭地鐵去將軍澳站,再轉乘廠車到電視城返工,早年才買入四驅車,直至早前馬明以八十萬買入Benz,換掉駕了多年的四驅車,馬明說買車也只為全家放假郊遊。

馬國明

多年來與家人同住,前年馬國明更以1,960萬元購入的太古城頂層連天台單位,令父母住得更舒適。


馬明與父母同住太古城多年,本身住所已是父母的物業,但前年他再花1,960萬買入頂層複式的過千呎單位,花過百萬裝修後最近已入伙。爸爸退休、媽媽係家庭主婦,馬明指自己依家算有點事業,可以讓父母依頼,很有滿足感。為了賺錢供樓,馬明馬不停蹄,頻頻工作。但放假時亦會陪母親逛街,認真孝順。

馬國明

長大後的馬明唔好名牌,早前做善事,馬國明出錢出力,著住小背心搬貨。


曾揚言婚後與家人同住

馬明曾經講過一切以父母為大前提,搵女友都要與家人相處融洽:「我係一個好顧家嘅人,所以做我女朋友,首要條件唔係靚,係要同我家人相處得來。我爸爸同媽媽出名好相與,如果結婚唔可以同父母一齊生活,咁就係女仔有問題,有問題就唔會結婚我本身又唔煙唔酒,所以我接受不到女友食煙及劈酒,因為我唔鍾意煙味酒味。」

馬國明

出名孝順又顧家的馬明,閒時會陪母飲茶行街。


不愛夜蒲 閒時踢波做義工

97前移民潮,馬明爸爸做「太空人」,媽媽陪兩女一子到溫哥華移民讀書,馬明是家中惟一男丁,所以所有粗重工夫如剷雪剪草都由他包辦,因做工程師的馬爸爸很希望子女都大學畢業,結果馬明揀在UBC機械工程系讀書,多年來看見爸爸努力工作辛苦供養三姊弟,去市區玩的車程加上住得遠所以馬明怕花費而甚少外出,偶爾會兼職幫補,這樣的生活直至畢業,亦因此養成不愛蒲的性格。而平日馬明不用開工的娛樂,除了踢波和陪家人,就是去做義工。

馬國明

馬明不煙不酒不夜蒲,佢認為自己不是純情,只是口味問題,因為他不愛烈酒的味道,夜蒲場合覺得好嘈而已!
鍾意就快D Share啦!
Related Posts Plugin for WordPress, Blogger...