一場爭執，成為了全港焦點。
曾參演無綫青春劇《四葉草》系列嘅《南華夢飛翔》、前年參加ViuTv搞嘅《美選D.n.A》嘅27歲模特兒Diva（許珮榆），直認就係噚日同大劉劉鑾雄喺希慎鬧交嗰個「短裙女子」。晚上Diva接受《蘋果》電話訪問，強調冇撞親大劉個仔，稱事發時「我拎住電話行上電梯，跟住有個阿叔鬧我：『做乜拎住部電話。』仲要極度惡劣，做乜拎住部電話，做乜望電話。」
Diva續稱：「佢係咁喺度鬧，之後越鬧越過份，我根本唔認得佢，仲同佢講阿叔你唔使咁勞氣㗎…」、「如果佢因為我同佢講積下口福而搵人打我，我惟有報警，就算佢係有錢人我都要講，事實上我都冇撞過佢個仔，做咩要鬧我先？真係好過份，佢大劉喎，咁多個保鑣點可能撞到佢，佢依家係鬧我驚我撞到佢個仔啊！係咁嘅，佢見講我唔過，就話我整容怪物，我即刻話依家去驗，如果我冇整容你係咪賠錢畀，佢用粗口鬧我，話我『戇XX』。」
大劉方才接受本報獨家電話訪問，澄清謂：「第一，我開頭唔係鬧佢，係好好聲氣嘅。我話，『呀姐姐，你左手拎電話右手篤手機，唔睇路，唔睇前面，好危險，好易發生意外撞親人！』」豈料女方即反唇相譏：「點會呀？我篤手機，有睇路，點會有意外？點會有危險？」
大劉表示，聽到Diva咁講，真係忍唔住：「你係咁睇住部手機，點睇路呀？你咁樣好危險。你撞到人，你跌親，會整到我仔女喎！」兩人為此發生爭執。
至於Diva話「個阿叔話我整容怪物」，大劉直認不諱：「我當時嬲得滯，鬧佢：『你個整容怪物！』我睇佢個樣都唔止整容一次網上傳聞話佢做過舞女、生過仔，我唔知真定假，唔關我事，但我絕對相信佢整容係真嘅。我用肉眼睇，估佢整容整咗N咁多次！」
大劉又指，Diva當時仍堅持冇整到大劉個仔，大劉喝問：「你整親我仔女、老婆，你搵咩嚟賠？」
至於Diva稱大劉怒從心起，「佢仲嬲，仲話搵人打我」，大劉解釋：「當時大家嗌緊交，一時之氣，梗係亂噏，邊得閒打佢？盞益咗佢！」又稱：「我依家咁肉緊，係因為呢啲電梯意外成日發生，係真係會死人，所以我先會話佢！」
|
鍾意就快D Share啦！
|
|
|
