港姐選舉尋晚圓滿落幕，即係意味上屆港姐冠軍雷莊𠒇（Juliette）正式卸任！早前已經講過唔會留港發展會返加拿大生活嘅佢，尋晚就難得現身公仔箱，為港姐冠軍加冕！事後，佢已經急不及待喺Instagram用法文留言「Et c'est fini!（結束了！）」仲上載與同屆亞軍何依婷及季軍黃瑋琦合照，有網民笑言唔講都唔記得係邊個！雷莊𠒇仲喺照片上寫咗「on to a new life（一個新的生活）」！而今日佢再用英文發長文講卸任感受，仲話「我從一開始就已經倒數」，唔少網友都留言：「好行唔送，再見！」、「究竟佢做過啲咩？」不過仍有好多人支持佢，叫佢勇敢追夢，去荷里活發展要加油，仲話「阿𠒇 我會不捨得你的」！
雷莊𠒇長文如下：
好多人問我卸任嘅感覺，Well～你可以從我面上嘅笑容睇得出，我真係好開心終於完成！如果你真係了解我，你會知道點解（當時機成熟嘅時候我就會公開）。但係我從一開始就已經倒數，點解？因為我總係對下一個事情更加興奮，就好似大學時夢想可以表演嘅感覺咁！真係好正，但我有更大嘅夢想，我一直以來都冇變過都係同一個人，忠於自己！我認為沒咩值得傷心，不久之前我就已經準備好繼續向前行了！
仲有人攞佢頒獎前嘅內心獨白同今屆司儀兼2015年港姐冠軍麥明詩做比較！
雷莊𠒇：
喺過去一年，對我嚟講好值得紀念，好多謝屋企人朋友支持我嘅fans，我感恩我經歷咗好多，學咗好多嘢，而且喺呢個過程入面，我認識到我生命中最好嘅朋友，依家我開始新生活嘅時候，我都會記得呢個咁精彩嘅旅程，我祝願新一屆嘅香港小姐，可以發放更多正能量，令大家變得積極同自信。
麥明詩：
一年前喺呢度講過要「賢良淑德」，今日我喺呢度加多句要「始終如一」。呢一年港姐畀咗我好多千載難逢嘅機會，但同時畀我面對好多選擇同挑戰，係一個旅途但都係一個磨鍊，磨鍊出賢明、良知、淑善同埋品德。呢啲經歷亦都令我學習堅定，唔好為別人忘掉自己、唔好被困難所折服，要毋忘初衷，一如既往！喺呢度想衷心多謝大家，係每一個嘅你畀我喺呢個健台上成長，亦都祝願下一屆香港小姐能夠薪火相傳，青出於藍。
邊個嘅獨白係有意思有感情？大家慢慢咀嚼吓喇～
|
鍾意就快D Share啦！
|
|
|