現年56歲嘅景黛音，80年代同戚美珍、廖安麗被喻為無綫《歡樂今宵》三小花，除咗做EYT之外，景黛音亦拍過唔少經典劇，包括同梅艷芳合作嘅《香江花月夜》，另外又喺《上海灘》做許文強老婆蘇旺娣，以及喺梁朝偉主演嘅《鹿鼎記》飾演建寧公主，最擅長演刁蠻女角色。另外佢又出過《少女情懷》、《香江花月夜》同《痴痴不再》幾張唱片，不過87年開始，佢就淡出娛樂圈。
之後景黛音同前無綫高層楊健恩結婚，仲生咗個囡囡，婚後佢專心相夫教女，直至幾年前，景黛音忽然愛上玩微博，自此之後不時放自拍相上去，唔少網民見佢個樣keep得好好，大讚佢係美魔女㖭。
原來，退隱江湖31年嘅景黛音，最近喺ViuTV製作部副總裁金廣誠誠意打動下復出拍劇，有消息話金廣誠4年前喺nowTV做高層時，已經搵佢做主持，但景黛音拒絕，但金廣誠未有放棄，直至今年初，景黛音終於答應演出為ViuTV拍一部講述兩母子之間問題嘅劇集，但詳情有待稍後公佈。
近期ViuTV都相當進取，繼鄭少秋、陶大宇、鄧萃雯同陳秀雯之後，竟然連退隱江湖31年嘅景黛音都成功游說復出，真係夠牙力！
《蘋果》今日打俾景黛音老公、前無綫高層楊健恩，問到佢老婆復出件事，楊健恩話:「唔知喎，你問番金廣誠吖。」但老婆復出唔使經老公同意咩？楊健恩話:「唔使我同意㗎呢啲嘢，我都唔知，佢同金廣誠傾。」咁支唔支持老婆出山？唔使湊女咩？楊健恩話：「佢做乜嘢我都支持㗎啦。個女都大啦。佢鍾意做乜就做乜，唔使我哋理㗎。」
精選娛聞，喺晒《娛果》
http://fb.com/appledailyent
| 退隱31年嘅景黛音將復出為ViuTV拍劇。(微博圖片/資料圖片) | | |
| | | |
|
鍾意就快D Share啦！
|
|
|
