大家都知，曾志偉憑「獎門人」幫大台打造過唔少佳績，不過今日有傳大台封殺呢位功臣，更要佢絕跡港姐活動。據聞爆煲原因係世界盃期間，志偉倒戈上ViuTV節目落大台面。有網民就此事發表意見指：「志偉使驚你TVB咩，之後更加會上多啲ViuTV呀！」《壹》仔亦向ViuTV方面查詢會否多啲同志偉合作，得到回應：「世界是圓的。」
其實志偉同大台關係轉差，可由2012年左右講起。據知志偉有意執掌大台綜藝節目組，結果由余詠珊揸旗。
2013年，余詠珊改革港姐競選賽制，由做Live變錄影。喺錄影期間，志偉忍無可忍大鬧：「X你老X，港姐係live，點解要錄影呀？」正式將與余詠珊嘅不和推上水面，同大台高層結下第一道疤。
直到2016年亞視唔再永恆，有傳志偉落足嘴頭氹啲大老闆接手，更挖角大台幕後人員，擺明要同大台拗手瓜，令大台高層震怒！
2017年，志偉又以「慘不忍睹」去形容當屆港姐，仲話：「變咗一個自家app廣告節目，失去咗向港姐致敬意義。」不過，志偉好快又現身大台2017台慶節目，雙方關係短暫破冰。
但，月前世界盃期間，志偉上ViuTV節目，又應ViuTV邀請拉明星足球隊去俄羅斯睇波，剃大台眼眉，所以大台終於要爆喇，落order封殺志偉。
既然雙方關係已經如斯田地，難怪志偉日前出席代言活動時，談到今屆港姐只能西貢取景，佢繼續不留情批評：「西貢咁遠呀？離將軍澳好遠喎！」
對於有傳大台封殺志偉，網民又點睇呢？
「今時今日無綫話封殺人，你話笑死唔笑死？」
「叫得佢做獎門人，就唔會咁易俾你封殺到啦。」
「到最後咪又係打個和囉，Super！」
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
