掃呢頁CODE去手機

2018年8月10日 星期五

本地波:【亞運不斷更新】樂仔做功臣 港隊響頭炮 __,樂仔,余文樂,

(港協暨奧委會提供圖片)【18:51】【全場完】香港3:1老撾港隊於亞運分組賽第一擊,於印尼大戰老撾,最終憑鄭展龍先開紀錄,再加上陳俊樂第一時間抽入靚 ...


(港協暨奧委會提供圖片)


【18:51】【全場完】香港 3:1 老撾

港隊於亞運分組賽第一擊,於印尼大戰老撾,最終憑鄭展龍先開紀錄,再加上陳俊樂第一時間抽入靚波,一度領先對手2:0;換邊後被對手追番球,形勢都幾惡劣,好彩門將袁皓俊有好表現屢救險球力保大門。於完場前8分鐘,陳俊樂迫到對手擺烏龍取得燕梳球,最終港隊贏3:1旗開得勝,堅叻仔!

【18:42】香港入波呀!85分鐘陳俊樂突破越位一射,省中對手入網,港隊3:1!

【18:33】76分鐘佐迪3連射,頭2次畀對方龍門救到,第3次省中樂仔,慘呀!

【18:27】70分鐘老撾拿菲舒克楔贏劉學銘撞射, 好彩袁晧俊救到咋

【18:19】62分鐘,老撾把握港隊防守失誤,由高美迪拿追番一球1比2,港隊頂住呀!

【18:17】泡泡龍拉傷被換走

【18:13】56分鐘, 安永佳接應角球一頂, 少少撻頭, 未能命中目標

【18:07】50分鐘,列斯奧第一時間射空門,但被護空門,入唔到第3球!

【18:06】49分鐘,佐迪set個靚波畀陳俊樂去射,可惜省中對方後衞出底線

【18:02】下半場開波喇!

【17:47】半場完,香港隊領先2:0表現唔錯,其中泡泡龍於前線頗有威脅,下半場Keep住!

【17:40】40分鐘港隊入多粒!陳俊樂禁區第一時間撞射入網,港隊領先2粒!

【17:37】老撾隊長哥哲倫,左路起右腳施冷箭,好彩袁皓俊飛身擋出,堅叻仔!

【17:20】20分鐘港隊入波!港隊右路射波門將甩身,鄭展龍執雞一抽入網,1:0!

【17:12】12分鐘,鍾偉強左邊落到底線,可惜無準,但港隊隊開始攞番啲攻勢

【17:09】老撾搶迫犀利,香港隊未有咩攻勢

【17:03】老撾首先射波中龍,好彩袁皓俊飛身撲出,港隊頂得住

【17:00】開波喇!香港隊身穿白衫大戰老撾

【16:30】港隊陣容已出,鄭展龍同佐迪將拍檔攻堅,大家一齊撐港隊!

港隊正選陣容

4-3-3

港隊正選陣容

門將:袁皓俊

後衞:徐宏傑、列斯奧、劉學銘、余沛康

中場:鍾偉強、陳俊樂、杜國榆、安永佳

前鋒:鄭展龍、佐迪

本屆雅加達亞運未正式揭幕,足球賽事已率先上演分組賽。香港U23代表隊今午5時,於A組登場迎戰老撾,主教練郭嘉諾直言第一場不容有失:「因為成個比賽最重要就係第一場波,只要個頭開得好,球員自然夠信心,感覺都會好啲。」

球隊於前兩日抵達印尼提早適應,「郭Sir」透露當地天氣較熱,與香港情況相近,惟舟車勞頓卻成球隊一大難題:「我哋到埗時間比較夜,加上由機場去酒店車程都有一個幾鐘頭。雖然比賽嘅場地好近酒店,大約兩公里左右,但係訓練場反而比較遠,起碼要搭成半個鐘至45分鐘車先到。」

球隊為求擊敗老撾,除給予球員更多休息時間外,在訓練量亦有所調整,務求達至最佳狀態。此外港隊早前已演練多套戰術,「郭Sir」更揚言今仗會以高空轟炸對手,務求憑身高優勢旗開得勝:「我哋幾個球員都有1米8幾,包括杜國榆、列斯奧及安永佳等,必定要加以利用。」港隊今次出戰亞運陣容之中,只得陳俊樂及林嘉緯有亞運經驗,「郭Sir」寄語一眾年輕小將:「希望成班球員集中啲,落到場真係可以享受咁大型嘅比賽。」(奇妙電視77台、有線602及662台周五下午5時直播)


來源 source: http://hk.on.cc
鍾意就快D Share啦!