女藝人背後無經理人公司撐腰，原來真係好易被人搵笨架！今次嘅受害者係白雲。
喺6月世界盃舉行期間，有位中間人B先生聯絡白雲，並提出到Party Room參與睇波活動嘅工作邀請。「我發現咗佢呃我，佢呃我話唔係酒吧活動，但我發現原來係酒吧。我cap圖問佢：『呢間唔係酒吧嚟架咩？』同埋你所謂嘅俾利是係幾多呢？佢話$1000。我同佢講：『你咁樣即係呃我，又話唔係酒吧。我唔接酒吧job，同埋得$1000我更加唔會接。』所以，我即刻拒絕咗。」白雲說。
中間人B先生唔死心，想用金錢以外嘅條件說服白雲參與酒吧睇波活動。白雲憶述：「之後佢繼續打電話、Send訊息俾我，話可以幫我攞到個機會拍一套電影，佢想用咁樣嘅條件換取我出席活動，但我都無答應佢，我直接喺電話回覆佢：『一定唔會去。』」咪以為真係波大無腦啦，白雲都話一聽就知係假。
不過，件事並無就此完結。後來有朋友Send咗一間酒吧嘅活動海報俾白雲，海報上印有白雲嘅相，仲聲稱佢會出席睇波活動。當時白雲身處外地旅行，又以為該海報只會張貼一日半日，所以無理會。點知直到8月20日，世盃都完咗一段時間，海報依然張貼於酒吧所處大廈嘅當眼位。於是，白雲聯絡中間人，又發聲明俾涉事酒吧The Venue。白雲話：「我喺嗰個聲明剩係話多謝Venue想我參與佢哋活動，但我無去到亦無收過錢，我寫得好客氣。我即刻都有問中間人，佢就話係PR公司無拆走poster唔關佢事，跟住就消失咗，無再覆過我訊息。」
中間人消失咗，白雲就聯絡The Venue嘅負責人，希望佢哋作出澄清及賠償：「第一，佢哋覺得唔關佢哋事，只係中間人同佢哋講我會去，所以我先會出現喺poster。但我話：『成個活動完咗喇，我都無出現過你個活動，點解我張相會喺poster上？仲要去到8月咁耐呢？』佢哋竟然話張poster唔係佢哋架，係PR公司設計、整出嚟、貼出嚟。我就話：『你唔可以唔認張poster係你哋嘅資產喎，有你哋logo喺上面喎。』咁佢哋就話冤有頭債有主，唔可以搵佢哋。」
白雲話件事令佢好嬲，由中間人到酒吧負責人，三個男人都好不負責任咁欺負一個女士，而且連句道歉都無，如果唔係白雲發聲明再出律師信，張Poster都唔知會貼到幾時。最慘嘅係，若果坊間真係以為白雲商演價只需$1000，咁就真係害死人喇，自己搵得少咗之餘，仲要俾行家話頂爛市，到時點收科？
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|