掃呢頁CODE去手機

2018年8月3日 星期五

再見亦是朋友?|康仔 __,康仔,蘇永康,

再見亦是朋友?|康仔再見亦是朋友,講就容易,但係有幾多人真係做得到?康仔身邊10個朋友,9個都想前度生仔冇屎忽,淨低嗰個就街頭見到前度,已經喺街尾搵路 ...


  • 再見亦是朋友?|康仔


  • 再見亦是朋友,講就容易,但係有幾多人真係做得到?康仔身邊10個朋友,9個都想前度生仔冇屎忽,淨低嗰個就街頭見到前度,已經喺街尾搵路走,廢事眼冤!

    最經典係舊同學Bobby,昔日無論喺幾人多擠迫嘅地方,都同女伴Maggie「豬豬」前、「豬豬」後咁,真係聽到都毛管棟。佢兩個因為性格不合而甩拖,分手之後,Bobby依然好留意Maggie嘅Facebook同Instagram動態,咪以為Bobby好長情、放唔低,實情就係想前度死。

    話說Maggie之後同咗個MK仔行埋,Maggie閨密Joyce同康仔都有兩嘴,聽返Joyce講,原來MK仔呃完「蝦條」之後就飛咗Maggie,最大劑係Maggie遲咗成個幾兩個月都未嚟M,惹嚟大肚疑雲。

    呢單嘢咁爆,康仔認為有必要同Bobby分享一下,畢竟小弟都係花生友,好想睇吓Bobby哥有乜反應,估唔到個衰仔竟然講得出咁泯滅人性嘅說話......

    「我收到風你個EX未有M到,點睇?」

    「Yeah!Yeah!」

    佢「Yeah」完兩聲之後,康仔忍唔住笑到標眼水......

    「你真係好憎佢喎!」

    「佢都差唔多年紀㗎喇喎,係咪停咗經呀?」

    愛嘅反面就係恨,昔日最親密嘅戀人,今日唔止變成陌路人咁簡單,而係對前度恨之入骨。雖然康仔唔知呢對舊相好有咩血海深仇,但Bobby嘅冷嘲血諷確係流露出佢對Maggie嘅怨恨。

    曾經聽同事講過「分咗手都想對方好」,點解會咁大方?同事話佢個EX乜都鍾意怨一餐,如果前度結唔成婚,實會返轉頭賴我同事嘥咗佢兩年最黃金時期嘅光陰。即係話,同事想前度好都唔係真係出於好意,而係想冇手尾跟。

    再見亦是朋友,再見就變敵人。你又係邊一種人?

    專欄作者簡介:

    康仔

    日頭返工攤抖,例牌遲到早走,收工約Friend飲酒,放假陪女玩狗。

    一日冗員,一世冗員,我是康仔。

    Facebook專頁:

    https://www.facebook.com/mynameishonghong/



    鍾意就快D Share啦!