2018年9月11日 星期二

【爆相爆片】黑的中環去灣仔索$280 行家怒剿害群之馬 __,爆相爆片,

有的士司機(白衫者)向乘客解釋他們疑搭上「黑的」,蘭桂坊往灣仔的車資不用280元,但被指是「黑的」的的士司機則用手機反拍行家。
的士司機服務質素參差,黑的劏客更加損害香港旅遊業嘅聲譽,的士司機侯先生同幾個行家,今日凌晨喺蘭桂坊等客,聲稱發現有個有劏客前科嘅行家超載,兼且載5個乘 ...


的士司機服務質素參差,黑的劏客更加損害香港旅遊業嘅聲譽,的士司機侯先生同幾個行家,今日凌晨喺蘭桂坊等客,聲稱發現有個有劏客前科嘅行家超載,兼且載5個乘客去灣仔竟然索價280蚊,比正常價錢大約高出6倍。行家追截嗰部有嫌疑嘅黑的,踢爆司機嘅惡行兼報警。不過,差人嚟到乘客已經走咗,冇辦法了解事件來龍去脈。



侯先生聲稱,呢個害群之馬喺行內已經好出名,佢本身做導遊,大約1年前開始兼職揸的士,但就經常喺蘭桂坊、廣東道、山頂搵食呃遊客,行家都睇唔過眼,已經密切監視佢有冇違法,一有發現就圍截佢同報警。今日凌晨行家同佢狹路相逢,見佢兜截5個估計嚟自菲律賓嘅遊客,開價280蚊車佢哋去灣仔。幾個行家追截佢去到雲咸街燈位前停車,叫乘客落車,話畀佢哋聽司機呃佢哋錢,叫佢哋攞返車錢。



行家圍攻爆粗指罵嗰個司機,眾矢之的嘅司機一直保持緘默,用手機反拍行家同整個過程。侯先生話因為差人嚟到嗰陣,班乘客已經搭咗第二部的士走咗,冇證人指證對方,所以差人冇拉到人。警方發言人表示,凌晨4點幾接報有兩方人因為的士超載嘅問題爭執,差人到場調查冇發現超載事件,列作誤會處理。



就黑的嘅問題,其實運房局早排已向立法會提交文件,建議用兩招打擊的士司機違規行為,包括針對重複濫收車資、拒載或兜路等6項罪行嘅司機,實行兩級制罰款,重犯者罰款可達2.5萬同監禁1年;又建議設的士司機違例記分制,兩年內扣滿15分停牌3個月。但有的士工會成員去運輸署抗議表達不滿。



你敢爆,我敢獎! 立即WhatsApp《蘋果》24小時爆相爆片熱線致電:63836568




鍾意就快D Share啦!
Related Posts Plugin for WordPress, Blogger...