掃呢頁CODE去手機

2018年9月18日 星期二

阿澤對抗「不停工」 員工返工即炒 __,阿澤,杜汶澤,

杜汶澤喺網上公佈話公司職員唔准返工,違者炒。資料圖片
杜汶澤喺網上公佈話公司職員唔准返工,違者炒。資料圖片颱風「山竹」餘波未了,噚日雖然風勢減弱咗唔少,但好多路都受塌樹影響,好多網民都促請特首宣佈停工,但 ...


颱風「山竹」餘波未了,噚日雖然風勢減弱咗唔少,但好多路都受塌樹影響,好多網民都促請特首宣佈停工,但特首冇理咁多,要返工嘅繼續等車返工。

反而某啲「民企」就顯示出通情達理嘅一面,好似杜汶澤鬧特首離地兼冇同理心之餘,仲宣佈自己公司員工唔准返工,違者炒。佢仲喺網上話:「不但普羅市民受苦,連好多半山友都話,塞咗一個鐘都落唔到山腳,谷氣決定返屋企!連大粒佬都咁慘,咁打工仔,又可以點?」



林德信噚日架車喺馬路爆胎,要搵油站職員幫手。

林德信噚日架車喺馬路爆胎,要搵油站職員幫手。

林德信座駕爆胎

良心老闆仲有喺油麻地開咗間甜品店嘅羅鈞滿,噚日舖頭休息一日,佢回覆傳媒時話:「今朝六、七點轉三號風球時,我出過街,屯門公路好多塌樹,荃灣有啲路直情係俾成棵樹攔晒,根本就唔適合外出,更談不上去返工。」噚日受餘波影響嘅唔止打工仔,仲有林子祥個仔林德信,有讀者見到佢噚日上晝大概11點,佢架車喺元朗錦綉花園附近嘅馬路爆胎,最後要駛到附近油站搵人幫手先換到胎。



趙學而劈樹開路

張栢芝亦都好關心民生,噚日喺Ig留言話想幫被風球破壞了屋企嘅市民。而趙學而噚日就孖建築師老公蘇國基自發去劈樹開路,見佢老公拎住把刀仔就已經清咗一截路,相當厲害。不過,衛詩雅就唔多好彩,佢噚日貼咗張相話手臂俾石屎擊中,佢事後受訪講番意外經過依然好驚:「1點幾鐘屋企滲水,我、媽咪同家姐喺我間房做吸水工程,突然間石屎就冧落嚟,嗰刻我唔識反應,只係覺得有嘢壓住自己隻手,因為好驚,叫媽咪快啲離開我間房,推佢哋出去。」佢即刻洗傷口,見到成手都係血,仲話感覺似拍緊林超賢導演嘅災難片一樣。

撰文:馮仁昭




鍾意就快D Share啦!