2018年9月14日 星期五

發老姣嘅阿姐|康仔 __,康仔,汪明荃,阿姐,蘇永康,

發老姣嘅阿姐|康仔SpeedDating呢行要增加客源,除咗話要口碑好、配對率高之外,仲要識得搞噱頭吸新客。隨住同事們怨聲載道,個個投訴冇時間處理公司 ...


  • 發老姣嘅阿姐|康仔


  • Speed Dating呢行要增加客源,除咗話要口碑好、配對率高之外,仲要識得搞噱頭吸新客。隨住同事們怨聲載道,個個投訴冇時間處理公司個社交網站之後,我阿姐終於諗通咗,決定「科水」搵啲KOL返嚟撰文,搞旺公司個Facebook專頁。

    阿姐搵咗位喺KOL界頗有名氣嘅才子幫手,仲約咗人哋出嚟食晏開會。喺meeting前一日,我哋幾位同事已經估到阿姐會悉心打扮,而佢亦冇令我哋失望,當日又低胸、又濃妝,同事都未問佢搞乜,佢已經身有屎咁搶答:「今晚去飲呀!」醒水嘅同事都知,阿姐又發老姣!

    由於呢個係私人會議,成班同事都冇機會睇阿姐「表演」,不過阿姐千算萬算,都算唔到呢位KOL係康仔嘅波友。當初開會推薦KOL嗰時,就係因為小弟胸有成竹可以鋪橋搭路,所以先提議用呢位老死,所以阿姐呢日嘅一舉一動,康仔都瞭如指掌。

    康仔:「喂,你冇危險吖嘛?我見佢(阿姐)今日一副戰鬥格返工,好似想去嗒你喎!」

    才子:「哈,食飯都冇乜嘢,之後佢Whatsapp我,又問我有冇女朋友,又問我會唔會考慮佢呢類型嘅女仔,你阿姐都幾直接㗎喎!」

    可惜才子見慣世面,根本睇唔上我阿姐呢啲大山婆。不過阿姐有樣嘢係抵讚,就係夠晒主動同埋單刀直入,加上「備戰」認真,好過大把唔嗲唔吊而又扮上菜嘅女多多聲。

    2018年,有對象就好去馬,唔好再搬埋啲「女追男係唔矜持」呢啲out咗十世嘅理論出嚟。蘇州過後無艇搭,我阿姐就有辦你睇,唔想好似佢咁,今日開始鼓起勇氣,向你嘅心上人表白

    -

    專欄作者簡介:

    康仔

    日頭返工攤抖,例牌遲到早走,收工約Friend飲酒,放假陪女玩狗。

    一日冗員,一世冗員,我是康仔。

    Facebook專頁:

    https://www.facebook.com/mynameishonghong/

    鍾意就快D Share啦!
    Related Posts Plugin for WordPress, Blogger...