掃呢頁CODE去手機

2018年9月20日 星期四

單立文胡蓓蔚拍拖結婚逾廿年 侯賽因坦言有小三 | C9頭條 | __,單立文,小三,胡蓓蔚,

111
單立文胡蓓蔚拍拖結婚逾廿年 侯賽因坦言有小三日前豹哥單立文(Pal)以侯賽因打扮亂入《開心速遞》,隨即引黎網民紛紛留言「掛住侯賽因」。講起侯賽因,當年 ...


單立文胡蓓蔚拍拖結婚逾廿年 侯賽因坦言有小三



日前豹哥單立文(Pal)以侯賽因打扮亂入《開心速遞》,隨即引黎網民紛紛留言「掛住侯賽因」。講起侯賽因,當年《賭俠》正正係豹哥單立文(Pal)另一個轉捩點。而同胡蓓蔚(豹嫂)拍拖、結婚加埋超過廿年,早前佢接受本刊訪問時,除分享工作經歷及大方分享同豹嫂嘅婚姻點滴同相處之道,又自爆自己有…小三?!




豹哥 時刻想老婆開心

問豹哥同老婆胡蓓蔚拍拖11年、結婚10年,中間有冇低潮?佢回答:「感情低潮無,其實我冇乜朋友,我嘅朋友就係佢,朋友係佢、老婆又係佢,佢take care得我好好,對於咁嘅女人,夫復何求呢?可以喺我低潮嗰陣同我一齊過艱難嘅日子,先至會珍惜依家收成期嗰種享受嘅日子。」

豹哥
豹哥相信婚姻真諦是自然而然、由心出發,沒有刻意經營:「我好多私人時間都係同佢(老婆)一齊,我放工就返屋企,我唔出街、我好宅,放工後嘅時間全部係我老婆嘅。」


有小三?

無試過婚姻有危機、誘惑?豹哥表示:「有個好有名嘅相士訪問我,話我哋如果舊年無細路仔嘅話,我到2020年就會有個小三,我即管睇吓呢個預測啱唔啱。其實我都想有小三嘅,睇吓我可唔可以經過呢個考驗,其實我都想考驗吓,如果唔係咁多年都幾悶吓,感情生活好似死水咁。」

豹哥

當年結婚,兄弟姊妹團陣容強大,容祖兒、蔡卓妍、張敬軒、陳奕迅等做兄弟,稱單立文做老竇的胡定欣當年陪好姊妹出嫁,friend足咁多年。


結婚咁耐,同豹嫂點保持甜蜜?豹哥話:「我覺得如果要畀心機keep就唔係婚姻,婚姻其實即係lifetime partner,你對佢好,真係衷心對佢好,每分每秒都為佢著想,每個moment都想佢笑、想佢開心,先至係真正嘅結合,都係出自真心,唔好玩玩吓、或者有其他外來嘅因素而影響到你嘅諗法。 」



老婆係「胡說八道會」中一員,好多時豹哥都要夾喺胡杏兒、胡定欣、黃智雯、李施嬅及姚子羚一班女人堆中間,佢話:「我覺得每個人都有個磁場,你釋出善意或者你真係真誠對人,人哋會feel到,佢哋幾個女仔喺其他人眼中可能係藝員、靚女、高不可攀,唔敢接近佢哋,但喺我眼中佢哋只係幾個傻婆、鍾意扮靚嘅𡃁妹、好真好直接嘅人,但係無人去理解、發掘佢哋,我近得佢哋多,知道佢哋個性,我同佢哋get along係好理所當然,因為佢哋真係好簡單嘅一班女仔。」



講到由宣布開騷到依家,反應都好好,豹哥笑言:「我知道有人惡搞,將海報改成『搖滾大嬸判』、『搖滾大細怒』。搞得你,即係你有noise囉,我都OK嘅、冇乜所謂!」

豹哥

何超儀(Josie)、林憶蓮、盧凱彤、何韻詩、盧巧音,被網民惡搞為「搖滾大嬸判」對老婆胡蓓蔚無份被惡搞,豹哥笑謂:「我諗佢唔夠大嬸啩!」


拍處境劇考紀律

拍處境劇《愛·回家之開心速遞》係咪令豹哥名利雙收?豹哥話:「睇你用咩眼光睇,呢個係好regular、好堅持嘅工作。每日七點起身,夜晚七、八點收廠,日日都係咁,三百六十五日唔可以休息,睇你個人嘅紀律係keep到幾犀利。初初未拍過,抱住戰戰兢兢心態去探索,但拍落,少少瀨嘢嘞,因為我係一個夜晚人,我凌晨三、四點瞓,最高峰期我係晏晝瞓覺、夜晚十二點起身,要三百六十度扭轉(作息),都幾慘吓。終於試到,而且已經習慣咗。」

豹哥

處境劇《愛·回家之開心速遞》一周五晚在電視曝光,豹哥透露:「公司最新畀嘅通告,話拍到出年。演繹一個咁長壽嘅角色,睇吓自己可以點樣演繹,都係一個挑戰。」


豹哥

老婆係「胡說八道會」成員,豹哥亦跟「胡說八道會」胡杏兒、胡定欣、黃智雯、李施嬅及姚子羚相處融洽。


正能量凍齡

問豹哥睇落唔似59歲,係點樣keep?豹哥直言:「我自己睇番自己,其實我老咗好多,不過我出鏡密,你哋唔覺,我覺得仲可以好啲,現今都市人年齡只係代號嚟啫,你睇李生(李嘉誠)90歲,做嘢、講嘢幾清晰,好值得大家借鏡。」佢又認為保持年輕某程度在於樂觀正面心態:「每日好開心咁去面對,唔會覺得係負累、無咩煩惱。我有段時間都好lost、好執迷,依家清晰咗啲,我覺得應該用呢種能量去影響吓人。」

豹哥

豹哥指跟黃貫中、恭碩良、夏韶聲、鄧建明合辦兩場紅館個唱,收益絕非首要考慮:「我覺得呢個係緣份、機會,唔係商業角度睇,我覺得係八、九十年代Band壇神話嘅延續,大家抱有希望,覺得香港嗰時係有希望嘅一個時代,充滿活力、上進、好有理想,呢個感覺應該延續落去,等成個社會開心啲。」


豹哥:想個社會開心啲

先講《搖滾大俠奏》演唱會,問豹哥幾耐無出過騷?佢話:「香港嘅話,對上一次係2015年底《Twins LOL 演唱會》。今次籌備呢個騷無得緊張,因為時間好緊迫,我日日拍緊處境劇,唔能夠抖。都無刻意練歌,係揸車嗰陣唱吓Carpool Karaoke (車上卡拉OK) 就有。」喺屋企有無彈結他、Jam吓?豹哥話:「一啲都無。所以今次要儘快練多啲,catch up番個standard!」



《開心速遞》係咪令豹哥更加入屋?個個都爆騷,係咪賺到盤滿砵滿?豹哥表示:「我覺得賺到嘅唔係爆騷或者盤滿砵滿,係一班演員日久生情,由好陌生、大家冇乜默契,變咗真係好似一家人咁,呢下幾攞命、幾珍貴。之前未試過,之前拍嘅戲或者劇都係三、兩個月,感情無咁深厚,依家一班人日日見面,叫阿哥、大妹、細妹,叫到真嘅一樣,好似家人咁關心佢哋,放假問出唔出嚟 食飯、病痛噓寒問暖,自己屋企人有時都好似無咁親。」

問佢出到街,觀眾有咩反應?豹哥搞笑形容:「依家我隨時按任何一個單位門鐘,話想嚟食飯,我相信都會畀我入去。以前有啲小朋友驚我,變到依家衝過嚟攬住我,我要講『死開啦、死𡃁仔!』」

豹哥

問豹哥拍開黃金檔時段劇,例如《踩過界》,轉拍處境劇,係咪要重新適應?豹哥直言:「每個演員喺每個job之前,都要粉碎自己,再代入新嘅角色,如果劇本無寫,自己再加入一啲前設,例如長大過程、點解佢會做呢啲嘢,再慢慢進入角色。」


欣賞西門慶唔壓抑

講到西門慶呢個角色,坊間傳話豹哥簽咗約先知係三級片?豹哥就回應:「其實呢個角色,第一次拍係半藝術嘅電影,叫《潘金蓮之前世今生》,係王祖賢做主角嘅時裝片,及後有人覺得我做得幾似,搵我做古裝版西門慶,嗰時興三級片,應運而生做咗七次西門慶。」

豹哥續說:「西門慶呢個角色睇你點睇,每個人都有情有慾,情慾喺一個人係缺少唔到,偏偏呢個角色好好呢樣嘢咁解,我覺得人咁抑壓做咩?西門慶幾好吖,唔抑壓、放晒出嚟,想媾你就媾你、想同你上床就上床,佢有間藥舖,藥可以叫做Drugs,令你好high嘅嘢都可以叫做藥,我諗佢嗰時都有隊吓嘢,我前設佢有隊嘢,隊完嘢、好開心,媾吓女,理所當然我係咁去做呢個人。」

豹哥

雖已事隔多年,更已「入屋」拍處境劇,但西門慶仍是一提起,就會聯想到單立文:「做咗七、八次西門慶,每次都有進步空間,都要畀番個like自己。」


《賭俠》侯賽因做大奸角,都係經典,心態係點?出到街有無壓力?豹哥指:「我覺得《賭俠》係另一個轉捩點,又係一個好長壽嘅角色,我早排幫一間財務公司拍咗個廣告,佢都係要我以侯賽因嘅身份拍,我心諗,我91年做嘅嘢,到依家,你都叫我做番呢樣嘢,我覺得都幾神奇、幾得意,呢個角色已經唔再乞人憎、唔再可怕,而係變咗可愛嘅角色,有咁嘅變化我都幾驚奇。」

豹哥

豹哥在《賭俠》中的大奸角侯賽因近年意外地被詮釋成可愛、鬼馬角色。


係個角色好成功?豹哥就話:「亦都係電影業嘅衰退,一個咁耐嘅角色都畀人一路記住,係咪因為新嘅戲嘅一啲角色,真係唔夠經典、唔能夠畀人再記得起,所以無限復活啲舊嘅角色,呢樣嘢我都有啲唏噓!」

豹哥

八七年組成的Blue Jeans成員有黃良昇(中)、蘇德華(左)和單立文(右)。


低潮期放縱自己

90年代除咗三級片,香港電影都經歷衰退,問豹哥有一段時間喺娛圈消失,嗰段時間夠唔夠錢開飯?豹哥答:「嗰排我打好多台灣牌(麻雀),去好多Rave Party,冇乜所謂嘅,大有大使、細有細使,嗰時都幾開心,放縱吓自己、放鬆吓自己,唔做嘢住、沉澱吓,都唔枉過,雖然係靡爛咗啲,直至我出番嚟做音樂,96年我同我老婆produce咗一隻碟,我亦都做好多Live Show,做好多音樂上嘅嘢。」

豹哥

讀完中學,單立文便到灣仔的夜場夾band彈bass搵錢。


幾時返TVB?豹哥憶述:「我92年簽TVB,05年出咗去、無再簽,全身再做音樂,96年之前我一半拍TVB、一半做音樂,後來音樂嗰 邊重咗,做好多領班、音樂總監方面嘅嘢,覺得係時候全心全意再做音樂。又做音樂又做幕前,我哋嗰排都溝到好亂,阿達(劉以達)啦、依家Eric Kwok都做㗎!其實好多歌星唱唔到歌掟咗去無綫度浸,浸一排變咗藝員,好多都係,阿廉(曹永廉)、阿蔣(蔣志光)、蕭正楠、(陳)敏之都係歌星出身㗎!歌星可以講係踏腳石,亦都係樂壇衰退,所以咁多人要轉行。」

豹哥

十一歲的單立文(右)與母親(右二)及兩名弟弟(左、左二)合照。


外間對《今晚睇李》評價好參差,李思捷都話個concept喺香港係嚟早咗,問豹哥點睇?有冇失望?豹哥回應:「唔失望,樣樣嘢都要有人試咗先,好多人用抄襲嚟攻擊《今晚睇李》,美國嘅Talk Show定咗係咁,等於踢波都係定咗咁打,我哋借咗條formula,但用我哋自己方法做,或者阿John(李思捷)人緣或者表達能力唔夠好,或者太過有自信、覺得佢孭唔起,攻擊佢呢樣嘢,唔係個個出嚟就有咁嘅地位,一定要慢慢建立。其實我哋係用心做,呢五十二集問心無愧。」

豹哥

豹哥2015年同李思捷主持節目《今晚睇李》,評價參差,翌年兩人繼續合作兩場《今晚豹制李》演唱會。


提到豹哥有做舞台劇,佢表示:「啱啱嗰次做《羅生門》都幾攞命,因為一人分飾四角,一出台無得休息,一路做,換衫又做第二個角色,淨係換衫都換到癲咗,好攰、好攰,一完場後台已經準備好張床畀我休息。我第一次係做《嬉春酒店》,開頭我有保留、懷疑,之後愈做愈順,評語好好,個滿足感第一次就係《嬉春酒店》。但講到做舞台劇係咪最有滿足感?又唔係,係做騷、演唱會,舞台劇有劇本、角色,做騷係你自己嚟,人哋(觀眾)鍾意嘅係真嘅你。」

豹哥

豹哥主演兩套舞台劇《嬉春酒店》同《羅生門》都同江美儀合作,《羅生門》中佢更一人分飾四角



有心唔怕遲

單立文人前人後都錫到老婆胡蓓蔚燶,二人相愛21年,早前慶祝結婚十周年,胡蓓蔚在社交網發長文道出十年人妻感受,大讚老公無得彈,而單立文亦有發文回應胡蓓蔚的稱讚:「我10年前喺唔清醒嘅情況底下做咗一個決定,其實結婚真係冇事嘅,人不Marry(結婚)枉少年,我真係冇後悔呀!」

單立文

豹哥於08年娶豹嫂,婚後一直過二人世界,而新婚初期豹哥揚言生仔順其自然,會晚晚不設防,但原來豹嫂未ready,所以肚皮一直冇聲氣。


單立文

胡蓓蔚更在社交網發長文讚老公,自爆第一次約會已被單立文寵壞,感激他成就了今日的自己,多年來每次外出旅行、食飯和睇戲,都由她話晒事,甚至煮完飯老公定必洗碗,覺得自己相當幸運。


結婚冇後悔,但生仔呢?仲唔行動就真係後悔莫及,多年來二人都甚少提生育計劃,原來是因為未達成共識,婚後豹哥愛妻如命,知道豹嫂未有生B的心理準備,所以一直順從與遷就,不過女人生仔年紀有限期,愈高齡風險愈高,所以豹嫂要把握最後機會衝刺。

單立文

單立文雖然band仔出身,但他性格平易近人又有幽默感,深受小朋友歡迎,早前與胡諾言兩個女一齊玩公仔,不知幾啱key。


現年59歲的保鮮男神單立文(豹哥),近年被無綫力捧劇接劇,在處境劇《愛回家之開心速遞》內的鬼馬演出更成功入屋。雖然豹哥升呢做「視霸」,但結婚十年仍未升呢做「人父」,明年60大壽的他,有指多年來與豹嫂胡蓓蔚在生育上有分歧,恨仔恨到發燒的他更提議過老婆做人工受孕,但胡蓓蔚就好抗拒落晒閘。

近年受身邊好友影響,胡蓓蔚亦改變主意,愈來愈鍾意小朋友的她,仲想以46歲之高齡作最後衝刺,希望能為單家繼後,話就話成功與否都今生無悔,不過加埋都過百歲,點會真係冇壓力呢?

單立文

單立文與胡蓓蔚08年拉埋天窗,為了慶祝結婚十周年,兩人上月到中環食飯慶祝,並拍下不少Sweet照放閃。



單立文

胡蓓蔚更在社交網發長文讚老公,自爆第一次約會已被單立文寵壞,感激他成就了今日的自己,多年來每次外出旅行、食飯和睇戲,都由她話晒事,甚至煮完飯老公定必洗碗,覺得自己相當幸運。


據知情者透露:「結婚頭幾年,佢哋都好想過自由自在嘅二人世界生活,但豹哥大豹嫂13年,佢一直都好鍾意小朋友,男人到咗某個年紀見到身邊朋友都有仔有女,唔多唔少會恨,本來豹嫂好堅持,佢好驚生仔令身材走樣,湊仔又會冇晒自由,但近年身邊好多姊妹都輪住生B,杏兒個仔仲咁得意,豹嫂做咗人契媽對得契仔多心態亦改變,不過佢今年已經46歲,要成功陀B真係好高難度,但佢兩公婆都話唔怕試,想喺冇壓力下進行,想作最後衝刺,到最後都唔成功咪繼續二人世界幸福快樂囉!」向來有做開運動最叻長跑、健身的胡蓓蔚,操得fit體能當然無問題,她希望在豹哥明年60大壽前有好消息。

單立文

胡蓓蔚與單立文由相戀到結婚至今21年,是圈中模範夫妻,明年豹哥便60歲大壽,豹嫂希望生個B賀老公。
單立文

胡杏兒去年生B,「胡說八道會」成員全部榮升做契媽,次次見到杏兒仔Brendan都爭住抱,B仔咁得意,搞到眾契媽都恨生B。


加強戰鬥力

過去不想給豹嫂生仔壓力,豹哥每次被追問生育問題都口不對心,曾公開笑言:「我已經係個大細路,生多個,老婆就要照顧多個仲辛苦,何況我都就快六張嘢,養到個仔女出身,起碼捱到八十歲,好慘啫!」難得豹嫂回心轉意,單立文亦不能怠慢,為了做個有心有力的爸爸,明年「登六」的豹哥勤做健身操弗自己,一來想努力造人更加得心應手,二來亦要為6月與黃貫中、Joey Tang等人在紅館開的「搖滾大俠奏」Band騷做準備。

單立文

被封保鮮男神的豹哥雖然年過半百,但身材keep得甚弗,有個愛運動的老婆,他亦唔敢發福。近年為生B最後衝刺,豹哥更加要操弗啲。
單立文

豹哥近年忙拍處境劇《愛回家之開心速遞》,憑鬼馬角色入晒屋,拍處境劇時間穩定,豹哥要好好把握機會,盡最後努力老來得子。


每逢節日及紀念日,豹哥一定人到禮到與豹嫂慶祝,又不時孖住出外旅遊歎世界,過去半年去過日本、泰國及歐洲等地,據知今年下半年二人已plan好行程計劃造人之旅,去旅行心情輕鬆,務求增加受孕機會。

單立文

這晚單立文與胡蓓蔚約友人食日本燒肉,夫婦二人食飽飽好滿足笑住離開。
單立文

一行7人排排坐食燒肉,豹哥豹嫂對所有人照顧周到,仲不時夾肉畀坐對面的一對小朋友。


早前本刊記者目擊單立文兩公婆約友人去食日本燒肉,席間還有一男一女小朋友,相信是友人的一對子女,現場所見,胡蓓蔚與小朋友打成一片,與他們逗玩時永遠掛住燦爛的笑容,母愛氾濫的她定必是個好媽媽,正所謂有心唔怕遲,豹哥與豹嫂的結晶品,一定會是個開心BB。

單立文

豹嫂是玩得之人,大合照時更被小朋友在後面整牛角大整蠱。



單立文

現場所見,豹嫂與小朋友感情要好,相信她與其父母甚有交情,食飽飽仲攬實小朋友合照,母愛盡現。
單立文

整個飯局氣氛愉快,有小朋友在場就更加開心,不過歡樂時光過得特別快,食完飯講byebye,豹嫂望住小朋友表現依依不捨,與豹哥孖住去拎車離開,又變回寧靜的二人世界。

Capby:東方新地










鍾意就快D Share啦!