偷嘢被揭發竟賴皮剝衫？話說吳小姐噚日下午4點行緊去香港工業中心地庫睇衫時，見到一個女人突然跑出嚟，尾隨有六、七人追住佢，之後女人一度匿入車底，最終被人拖番出嚟，膝頭擦損晒，未幾聽到女事主話有個女人偷佢電話，其餘四至五人原來係見義勇為嘅途人同店員，圍住女扒手唔畀佢走。
不過做得賊又點會咁易放棄逃跑，吳小姐見女扒手為突圍，突然扯甩晒身上衫褲鞋襪，一有男人埋身就話：「你掂我就嗌非禮！」然後趁冇人捉實之際，屢次企圖越過馬路飛奔至香港工業中心對面工業區，結果都係被途人捉住唔放，之後又嘗試走入商場，趁人多混亂逃走，結果俾保安制服，報警拉人。
女扒手一直否認偷手機，但當事主打番自己手機時，女扒手個袋明顯有震動，當場人贓並獲，但死口唔認個袋係佢嘅，仲向警察投訴「班人捉住我、打我！」警員向現場事主同目擊者錄取口供，就將女扒手帶署調查。
吳小姐話香港工業中心係偷竊黑點，自己半年前都試過喺嗰度唔見手機，今次係靠店主發現女事主背囊袋口打開，繼而目擊女扒手將女事主部手機放入手提袋，先揭發呢宗案件，所以日後出入嗰度會小心財物。
警方回應噚日下午4時許，一個45歲越南女子懷疑盜去一個35歲姓袁女子手袋內一部約值8,000蚊嘅iPhone，警方到場制服女疑犯，仲喺佢個手袋內撿獲事主部手機同另外兩部手機，以涉嫌扒竊拘捕帶署。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
