39歲卓韻芝同34歲從事電影美術嘅「閃電俠」梁子賢已註冊，佢哋今晚無懼山竹吹到香港，一對新人喺中環外國記者會舉行婚禮，鄭秀文（Sammi）做伴娘，蔡卓妍（阿Sa）同梁詠琪（GiGi）姊妹。阿Sa、GiGi同Sammi都扮靚靚到賀，佢哋接受記者訪問，仲風騷大派心心，阿Sa話：「我哋係最舒服嘅姊妹。」原來婚宴上冇玩新郎，GiGi話：「冇呢part，可能佢錫住新郎。」阿Sa再話：「我哋負責嚟靚，費事玩人玩着自己。」 Sammi就話：「來戥佢開心，佢今日件婚紗好靚，唔捨得玩爆佢。」
阿Sa、GiGi同Sammi異口同聲都話會忙，Sammi話：「伴住佢影相、見證，忙擺甫士，來搞氣氛、吹水。」阿Sa就話可頂酒：「可以頂幾杯。」Sammi話：「我個樣似飲得，我好渣，靚酒咪飲多啲，唔靚唔飲。」人妻GiGi同Sammi可有向新娘阿芝分享相處之道？GiGi話：「之前Bridal Shower分享咗，佢識㗎喇！」Sammi覺得人人唔同：「結得婚，佢諗佢啦。」GiGi大讚阿芝今晚最開心同最神彩飛揚。
問到三女送甚麼賀阿芝？Sammi要保密，GiGi用人情行善，阿Sa話唔知妹要送，冇準備後補：「我哋識於微時。」可會催阿芝生B？Sammi話：「佢想生咪生，唔會特別期待，佢開心就好。」阿Sa被取笑又嚟接花球，Sammi笑佢接埋回家做乾花，阿Sa話：「我問助手，到底我邊個朋友未結婚，應該仲爭祖兒，但一陣我避一避先。」今晚做伴娘嘅Sammi晚宴時要帶新娘進場，佢話有綵排咗一次：「綵排時扮認真走位，好鬆散，最緊要開心，唔好太大壓力，鬆散嚟，鬆散去，鬆鬆散散。」阿Sa取笑阿芝都好鬆散，而GiGi就爆新郎同兄弟都好緊張。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
