韋家雄娶老婆，請嚟一班「綠葉」兄弟襯托自己，識啲玩法喎。不過，呢班兄弟有啲非一般，事關韋家雄搵佢哋嚟唔係幫自己頂酒，反而需要佢哋幫手灌酒！
韋家雄今早順利完成挑戰，浩浩蕩蕩咁接走新娘子，真係一副勝利者姿態架。一身傳統婚嫁服飾嘅新人，滿面幸福喜氣洋洋。見傳媒影相時，韋家雄依然忍唔住眼甘甘望實老婆，果然係「我的眼裡只有你」，新娘子更被佢望到有啲既尷尬又開心。
之後兩人徇眾要求咀嘴，而且韋家雄愛意泛濫，錫極都唔夠，係咁嘟長個嘴繼續索吻。係幸福嘅，不過都好骨痺。
直到上車時，從韋家雄一啲細微動作就睇得出，新娘子以後一定好幸福，因為韋家雄依然會主動開車門，小心扶老婆上車坐好。到自己上埋車坐低，再錫下面珠晒下幸福先施施然離開。
喺一對新人離開前傾咗兩句，問到有無分配兄弟幫手頂酒，兄弟們即刻異口同聲話：「係佢幫我哋頂呀！佢搵我哋做兄弟係負責『隊』佢，因為唔俾佢飲佢會發脾氣。」新郎哥聞言笑騎騎：「我會自己飲返，佢哋負責把我灌醉，平時我會打啲酒精入身體。」咁今晚真係拭目以待喇。
來源 source: http://nextplus.nextmedia.com
|
鍾意就快D Share啦！
|
|
|
