大台力捧小生何廣沛，喺劇集《跳躍生命線》中，戲份同馬德鐘有得揮，甚至更多。對何廣沛嚟講，絕對係好事。不過，觀眾對佢嘅表現，彈多過讚。演技上，話佢浮誇戲假把聲又作狀；角色上，成日衰衝動做錯事仲要駁嘴，搞到係咁被人「卓家傑」、「卓家傑」、「卓家傑」，好鬼煩。正面啲睇，能夠為觀眾留下深刻印象，更成為吳卓羲接班人做大台衝動王，都算係另類上位，好事嚟嘅。
其實持平啲睇，卓家傑熱血衝動都係劇情鋪排啫，事關按一貫大台劇風格，遲下佢必定會因為衰衝動而搞出大頭佛，而且極大可能係害死身邊啲手足，然後反省改過，最後成為獨當一面嘅救護員，好似在哥（馬德鐘飾）咁。
咁究竟死咗邊個手足，令新衝動王角色性格大逆轉呢？按道理係：在哥教極卓家傑都唔聽，最後為救佢犧牲自己，令卓家傑終於明白在哥苦心，立志改過。
不過據TVB官方劇照，何廣沛劇中細佬羅天宇受傷被送上救護車，佢犧牲嘅可能性比在哥更大。但，諗深一層，羅天宇都係男主角之一，賣鹹鴨蛋可能性唔大。
所以，《壹》仔認為死嘅會係雄姐呂劍雄（張彥博飾），絕對唔係齋噏當秘笈，因為片頭有一幕係疑似浩園，卓家傑做代表企喺墳前，死者明顯係手足，仲要係同卓家傑好老友嘅人。再望望出席嘅人，第一排左至右有譚家俊（羅天宇飾）、常朗天（李霖恩飾）、高行仁（韋家雄飾）、陸昊然（郭子豪飾）、麥在田等，偏偏唔見雄姐。而且重點係，消防及救護學院方Sir（冼灝英飾）亦在場，身邊仲有雄姐5個家姐哭成淚人。邊個死咗，好明顯啦。
來源 source: http://nextplus.nextmedia.com
|
鍾意就快D Share啦！
|
|
|