藝人呢條路真係唔易行，「雄姐」張彥博就係最好例子。
識彈琴識結他，唱歌、樣子亦唔差。2005年，25歲嘅張彥博以組合「赤子」進軍樂壇。不過「赤子」四年後約滿解散，張彥博無嘢撈，試過幕後幫手set音響。嗰段時間，佢形容係「人生低潮，連抬頭望人都唔敢」。
喺香港覺得難受，張彥博2012年開始轉戰內地音樂節目《聲動亞洲》、《快樂男聲》，一個人加一支結他，足以吸引評審譚詠麟、李克勤都要落場同佢jam歌。最後雖然贏唔到獎，但贏到人氣，連大集團銀聯都搵佢拍廣告，自信即刻晒嚟，之後更有機會參演舞台劇，期間識埋王祖藍，喺對方鼓勵下，返港入讀藝訓班，同學係細佢十歲嘅蔡思貝、陳凱琳。
入咗無綫，梗係要由茄喱啡做起，角色名字唔係某某朋友、兄弟，就係A君手下B君家丁，直至2016年《一屋老友記》廢青細寶一角，張彥博開始正式入屋，無綫亦睇準機會，有意安排佢飾演《愛•回家之開心速遞》入面嗰隻鬼──龍璟風。不過，原來張彥博仲未放棄音樂夢，當時簽咗俾王祖藍，出咗隻歌《圓缺》，龍璟風一角亦順理成章改由顧紀筠個仔陳浚霆飾演。
講真，睇得出無綫真係俾好多機會張彥博，今次《跳躍》雄姐跑出，嚟緊仲有《包青天》、《金宵大廈》、《解決師》、《法證先鋒》等劇，好彩嘅話再次跑出，咁就真係苦盡甘來喇。
來源 source: http://nextplus.nextmedia.com
|
鍾意就快D Share啦！
|
|
|