今日係苟芸慧大喜日子，一對新人見傳媒時，估唔到平時喺唔同國家參加賽車、見慣大場面嘅新郎哥陸漢洋，竟然怕羞喎。當在場記者要求兩人咀嘴合照，新郎哥竟然一支箭標走咗，留低苟姑娘獨挑大樑，難怪扁晒嘴唔開心啦。
講吓笑啫，可以娶到個咁靚身材咁正嘅老婆，陸漢洋點捨得放手呀，佢不過係行開吓，俾機會大家幫新娘子影獨照啫，話晒苟姑娘今日咁索、事業心咁強勁，唔影多兩張相點交到貨！
苟姑娘solo完，新郎隨即歸位，應大家要求錫錫，而且訪問時有問必答，好識do架。講到婚後造人大計，原來兩位仲想奮鬥多兩、三年，順便建立下做父母嘅心理準備先，所以未咁快喎。
姊妹團方面，認真唔講得笑，個個都係女神級數，當中最突出一定係佗緊7個月嘅李亞男啦，外形仲係咁fit，唔認真睇真係唔覺大緊肚。另外，就嚟五張嘅伍姑娘都仲係好省鏡，拍埋其他姊妹身邊一啲都唔輸蝕，仲多出幾分型格添。
來源 source: http://nextplus.nextmedia.com
|
鍾意就快D Share啦！
|
|
|