「過馬路要小心，咪求望快一陣」，呢支歌仔由小編學生年代就開始唱，但依然好多人當係耳邊風，其實一時貪快，真係後果嚴重，分分鐘命仔都冇埋。好似牛池灣呢位小妹妹，落校巴衝過對面馬路，好彩只係畀的士擦過，執返條命仔。
讀者李先生係牛池灣威豪花園嘅居民，今日(29日)下晝1點幾，佢喺屋苑入口外，睇住件事發生。由李先生提供嘅閉路電視片段見到，畫面右方一架小學校巴停喺路邊，一名女同學落咗車，見到對面馬路一位相信係佢家長嘅女士，女同學即刻心急衝過馬路，點知呢個時候，一架的士駛過，喺女童身邊擦過，佢即時跌低咗，對面位女士嚇到即刻衝去女童身邊，場面十分驚險，的士司機即刻落車了解，而屋苑嘅保安亦都馬上出來協助。
李先生批評，校巴司機喺意外中責無旁貸，「點解會無大人指示下，由得個小朋友落車行咗去？」李先生話，事發時，女童嘅視線明顯被校巴擋住，根本睇唔到有車駛埋黎，認為司機喺呢個位置停車好有問題，「真係好危險，佢早一秒過馬路就死得！」
警方回覆話，今日下晝1點幾，57歲姓楊的司機，駕駛的士於永定道將8歲姓陳女童撞倒，女童腳部受輕傷，被送往聯合醫院治理。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
