掃呢頁CODE去手機

2018年10月16日 星期二

【Tom@Mr.飛奔醫院】6歲兒子被鉛筆插眼 何思諺:寧願受傷嗰個係我 __,Mr.,

Tom同Leanne嘅6歲囝囝被鉛筆插眼(網上圖片)
【新增回應】樂隊Mr.嘅30歲鼓手杜志烜(Tom)同model老婆何思諺(Leanne)結婚7年,兒子杜卓霖(杜杜)今年6歲,今日Leanne在社交網 ...


【新增回應】



樂隊Mr.嘅30歲鼓手杜志烜(Tom)同model老婆何思諺(Leanne)結婚7年,兒子杜卓霖(杜杜)今年6歲,今日Leanne在社交網上載囝囝右面貼大紗布相,原來杜杜不小心被鉛筆插眼!



意外發生咗一星期,Leanne照顧兒子痊癒後,先喺網上講述事件經過,佢寫道:「上星期收到好多朋友慰問,問關於杜杜點解變咗單眼杜,唉!真係一個低級錯誤!以前成日聽啲長輩講,要小心啲鉛筆插眼啊!我成日都覺得小心啲就得㗎喇,點知,就發生咗喺杜杜身上!」



幸好上天保佑,杜杜嘅傷勢唔嚴重:「今次算好好好彩,係視網膜花咗少少,滴眼藥水同塗藥膏就好番,呢個係對杜杜嚟講一個好好嘅教訓。放心放心,佢巳經好番晒㗎喇,個幾日佢睇唔到嘢,大部分時間都合上眼睛,而我一直都喺佢身邊,睇下佢有咩需要,又講下故事俾佢聽啦,俾啲音樂佢聽啦,有幾次佢捉住我隻手同我講:『媽咪~你放心啦我好快無事㗎喇~』」



身為母親嘅Leanne為兒子受傷感心痛,寫道:「唉!講真,我寧願受傷嗰個係我,嗚嗚嗚!我都會繼續觀察一下有無後遺症,呢幾日真係無覺好瞓,嗚哇!身心交瘁啊!養兒一百歲長憂九十九!明啊明啊明啊!」



Leanne上載了當日三張相片,包括杜杜受傷送院後,Tom即刻飛車趕到醫院抱着囝囝安慰,返家後年紀小小嘅杜杜驚惶未定,要捉住媽媽隻手放在心口,要媽媽陪着才能安心瞓覺,最後一張是去覆診時,喺凳上瞓着了。



《蘋果》聯絡Tom了解囝囝情況,佢以短訊報平安:「冇事吖,多謝關心啊!今個星期一已經好番啊!」問到視力有否受影響?Tom表示:「冇影響放心,星期一已經返咗學啦,冇問題。」



之後Tom接受電話訪問親述事發經過,當日囝囝放學排隊等校巴時發生意外:「佢喺學校唔小心自己整親,佢好鍾意畫畫,揸住支鉛筆想畫嘢,唔小心插到自己隻眼睛,好驚,嗰時我綵排緊,老婆接佢放學,一落車見佢撳住隻眼,佢話痛,老婆見到佢眼睛有少少花花哋,即刻帶佢睇醫生,眼科醫生檢查後話佢眼角膜花咗少少,唔係好嚴重,不幸中大幸,再插深啲可能篤爆眼球,所以執番身彩。」



Tom坦言之前已叫囝囝小心:「我都同阿囝講,真係唔好攞住支鉛筆周圍玩,之前已經同佢講好多次,但佢鍾意畫嘢,諗到過癮嘢就周圍跑喺度畫,依家佢都驚,因為連續幾日擘大唔到隻眼睇唔到嘢,傷口痛到大叫,因為眼角膜花咗,最擔心細菌感染就好麻煩,所以佢沖涼時唔畀水整到隻眼,又唔係好敢同佢洗面喎,嗰幾日塊面污污糟糟,涼又冇沖喎,依家ok啦,我哋仲觀察緊,因為隻眼仲有少少紅紅哋,跌損吓我都接受到,但隻眼受傷真係好驚,我哋冇鬧佢,佢都知自己唔啱。」



精選娛聞,喺晒《娛果》

http://fb.com/appledailyent



Tom同Leanne嘅6歲囝囝被鉛筆插眼(網上圖片) 杜杜受傷後要捉實媽媽隻手瞓覺(網上圖片) 杜杜受傷後要捉實媽媽隻手瞓覺(網上圖片)
Tom飛車趕到醫院陪囝囝(網上圖片)

Tom飛車趕到醫院陪囝囝(網上圖片)
好在囝囝已經好番,視力沒受損。(網上圖片)

好在囝囝已經好番,視力沒受損。(網上圖片)
杜杜到診所覆診時瞓着(網上圖片)

杜杜到診所覆診時瞓着(網上圖片)

鍾意就快D Share啦!