黃翠如同男友蕭正楠現身台慶一齊接受訪問，講到翠如今晚只係露膊，蕭正楠話女友最性感係膊頭：「好靚呀呢啲，啲鎖骨唔係個個有，我自己就冇啦。」講到今晚個個女藝人都性感，翠如有冇撳住男友唔畀佢周圍望？蕭正楠話：「Sorry喎，我今晚睇唔到其他女仔喎，我見到阿廉（曹永廉）囉！我見到其中一個有反應就係阿廉囉。」
翠如問佢有乜反應，佢就話：「憤怒嘅反應。」蕭正楠話近排拍劇，所以今晚台慶只會表演輕鬆短劇同《美女廚房》。講到今晚頒新加坡同大馬視帝視后，翠如話蕭正楠入咗最後5強，自己睇好男友，蕭正楠就話：「多謝多謝，有佢睇好我，信心真係多咗0.5。」問佢心目中有乜競敵，佢話唔清楚有邊個提名，但覺得《宮心計2深宮計》嘅馬國明同陳煒呼聲都好高。
另外，胡定欣透露準備件戰衣已經大半個月，佢話：「每年年尾公司都有好多大型活動，好頭痛究竟最後揀乜嘢衫呢，比較難呀，我好滿意今日選擇囉，一啲祼色打扮，比較少啲。」講到無綫上年有「限奶令」，無綫今年又有冇服裝指引？定欣話：「其實都冇，我覺得如果有身材有本錢，都不妨同大家分享吓，我都適當地分享，同埋都係嗰句，最緊要靚。」
講到最近傳佢放棄為自己視后拉票，全力幫好友黃智雯拉票，定欣否認話：「我從來都唔在意，我覺得獎項對每一個藝人嚟講，都係一份支持，同埋我覺得女仔嚟講競爭幾激烈，我都好支持我好姊妹智雯，煒哥我都好支持，希望今晚佢哋都有好成績啦(馬來西亞同新加坡視帝視后)。」
講到視帝，定欣話：「都難㗎，叮噹馬頭，我真係估唔到，私底下同事都會討論視帝係邊個嘅。」問老友胡杏兒係咪有第二胎？佢話：「我哋都比佢更加着急，佢都準備緊嘅，我哋聽日有活動，等佢自己講啦。」
Google Play 2018 年度最受歡迎應用程式，請即點擊 http://bit.ly/2FCthz5 投《蘋果動新聞》一票
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|