張衞健妻子張茜於08年在懷孕八個月時流產，當時張衞健傾力協助太太復原，不過原來身陷失胎陰霾的，除了張茜，還有張衞健自己。張衞健日前在尖沙嘴接受《蘋果》專訪，他回憶時仍猶有餘悸：「當年都唔知自己受創傷，只係知道如何去照顧太太，到太太走出陰霾，原來我仲喺裏面！」
撰文：余燕儀
攝影：陳慧安
張衞健99年與張茜因拍劇認識，兩人於04年結婚，09年行禮。張茜長期在北京工作，而健仔家人及朋友則在香港，不時要分隔異地，他笑說：「我哋唔會check電話，我哋不停做到小別勝新婚，見到好開心好珍惜，見唔到時候會信任對方。」08年，張茜懷孕八個月流產，向來淡淡定定的健仔也方寸大亂，只知出盡法寶幫助太太：「我整個人所有心神、細胞，完全投入喺佢身上，希望佢以最短時間身心得到一百巴仙恢復，做啲乜嘢可以令佢忘記呢，同佢玩乜嘢遊戲可以開心一個鐘、半個鐘？15分鐘都好吖！快啲帶隻狗返嚟先，佢見到隻狗就開心，又或者買啲時裝雜誌先，佢咁鍾意睇。」
| | |
今年參與治療
張茜在健仔悉心照料下，很快便走出陰霾，反而仍有問題的原來是他。健仔說：「今年我參與天主教會關於失胎父母心靈治療講座，當中我學識一樣嘢，大部份朋友都將所有注意力擺喺女人度，當然係女人最痛苦，但大部份嘅人都忽略咗爸爸都好hurt，甚至乎自己都唔知，正正好似我咁。」健仔指當年不知自己受創傷，只知道如何去照顧太太：「到太太走出陰霾，原來我仲喺裏面，參加完呢個講座，我先意識到老婆好番之後，自己都唔係咁好，唔係好開心，閉閉翳翳。如果有讀者失胎，除咗照顧女士，大家都要注意男士嘅創傷。」
幫藍潔瑛讀經
留港的時間，健仔就是為了多見母親及情同手足的好友許志安、蘇永康及梁漢文，反而他跟前經理人兼胞弟張衞彝（Henry）卻兄弟緣淺。曾患抑鬱的Henry早年指健仔拖欠其2千萬元佣金，健仔稱指控不實，張母亦力撐健仔孝順兼顧家，自此兩兄弟甚少來往。今年1月，Henry倒斃上水寓所，健仔說：「今年年頭Henry去世，好徬徨，唔知道點去照顧後事，記得入教堂追思彌撒嗰刻，我仲好亂，有個男仔行埋嚟同我握手，笑住講：『今晚我會為你弟弟追思彌撒讀經，放心，今晚會一切順利進行，你哋唔好太傷心！』」
這名陌生男子的笑容，令健仔感到莫名的溫暖，之後健仔反思：「我可唔可以做佢嘅角色？我同佢三唔識七，佢都嚟幫我弟弟讀經做義工，如果一個唔識嘅人舉行追思彌撒，我可唔可以好似嗰個人咁，行埋去同家屬講：『你好，我係張衞健，我今晚將會為亡者讀經，放心，今晚一切會順利進行，唔好太傷心！』」就是因為這個想法，雖然健仔跟藍潔瑛不熟，早前他也去到藍潔瑛的追思彌撒上幫忙讀經，為的就是希望將這一份人與人的關懷散播開去。
跟父斷絕來往
其實近年Henry與健仔有否修好？健仔坦言：「我覺得作為一個哥哥，應該做嘅我都盡咗力。咁多年嚟我有冇做過一啲對人唔住嘅嘢，我相信任何人都有，我哋唔係聖人，但喺我人生，對人對事盡量唔好有遺憾，尤其對老人家。」健仔讀中二時爸爸因有外遇拋妻棄子，自此兩父子斷絕來往三十多年，對父親有遺憾嗎？健仔淡然說：「更加冇遺憾，可以講係冇乜感情嘞，見到可能唔認得㖭，怨恨真係冇，一百巴仙冇，反而某程度上感謝。如果佢一直陪住我長大，我唔會17歲去酒廊唱歌搵食，19歲唔會去參加新秀攞咗冠軍。」希望跟父親見面？他搖頭說：「我話畀你聽會都呃你啦，但講真，如果𠵱家我父親突然出現喺我面前，或者透過親戚朋友表示可唔可以照顧佢，我會。」
場地提供：W Hotel
|
鍾意就快D Share啦！
|
|
|
