掃呢頁CODE去手機

2018年11月22日 星期四

【爆相爆片】意大利男涉非禮 被途人合力制服 __,爆相爆片,

周三晚8點幾旺角塘尾道天橋突然有好多人聚集圍觀,有個外籍人士仲俾多人截住唔准走,究竟發生咩事呢?原來有人懷疑手多多,涉嫌非禮一名女途人,其他熱心途人經 ...


周三晚8點幾旺角塘尾道天橋突然有好多人聚集圍觀,有個外籍人士仲俾多人截住唔准走,究竟發生咩事呢?原來有人懷疑手多多,涉嫌非禮一名女途人,其他熱心途人經過見到,於是就幫手捉住個色狼,之後將個色狼交咗畀趕到嘅警員,帶返警署調查。



目擊市民黃先生當時經過天橋,佢拍低咗相片,片中可以見到一個着藍色外套嘅外籍男子,俾最少6、7人捉住,其間個外籍男子不斷掙扎想走,但結果梗係走唔甩啦。



其中一位着紅衫嘅正義哥睇唔過眼有人涉嫌非禮,就叫其他幫手捉人嘅市民捉實啲,話個色狼好大力,仲爆粗鬧爆個色狼:「非禮?!」,表現得相當勞氣。不過個色狼係講英文㗎嘛,似乎就唔明對方粗口有幾勁囉。



現場被人非禮嘅女事主好激動,喺度大嗌之餘仲喊添,正義哥就不斷同佢講:「你冷靜啲先,冷靜啲先...你唔使驚㗎。」有其他女途人亦喺受害人身邊不停安慰。案發之後,警員接報好快就到場處理。



警方表示,周三晚8時許,在旺角亞皆老街與新填地街交界 發生一宗懷疑非禮案件,35歲女事主尾隨追截並準備用手機報警期間,手機遭涉案外籍男子搶走拋落地下砸毀,兩人在亞皆老街與塘尾道交界一條天橋上發生糾纏,女事主被推跌地上,途人見狀合力將男子制服,警員接報到場調查,將涉案46歲持香港身份證的意大利男子拘捕,兩人分別受傷及不適,一併由救護員送院治理。



警方經初步調查後,列涉嫌非禮、襲擊致造成實際身體傷害及刑事毀壞處理,案件交由旺角警區刑事調查隊跟進調查。



你敢爆,我敢獎! 立即WhatsApp《蘋果》24小時爆相爆片熱線致電:63836568





涉案意大利男子被捕。 涉案意大利男子被捕。
見義勇為市民協助調查。

見義勇為市民協助調查。

鍾意就快D Share啦!