掃呢頁CODE去手機

2018年11月17日 星期六

【力抗李佳芯陳煒】 網民熱捧視后 黃智雯美容店幫手執頭執尾(足本版) __,李佳芯,視后,陳煒,黃智雯,

為咗個視后,李佳芯話唔生B唔結婚佢套《BB來了》係ok,不過,蝕在太小品!嗱,陳煒係好戲,可惜套劇唔爭氣,冇乜noise!仲有邊個可以爭?係喎!四月播 ...




為咗個視后,李佳芯話唔生B唔結婚 佢套《BB來了》係ok,不過,蝕在太小品!

嗱,陳煒係好戲,可惜套劇唔爭氣,冇乜noise!

仲有邊個可以爭?係喎!四月播嗰套《三個女人一個「因」》入面嘅黃智雯夠晒班

劇中患三重人格障礙症嘅佢,一人分飾三角,大狀方以因、癲喪嘅Pina Colada,仲要演埋有抑鬱嘅愁擘擘。

仲記得套劇出街時,人人都話有驚喜、夠新鮮,黃智雯應該要拎視后。

衰在套劇太早出街,搞到淡晒,不過,原來好嘢真係有人會記得,好似網上面不同嘅討論區,已經開緊post投票心水視后。

以為黃智雯係黑馬啦,竟然係大熱!仲要個個都讚佢,代表佢真係有實力,咁又係嘅,一人分飾三角,仲要三個角色都做得咁好,係堅嘅。

平時好少見黃智雯俾人影到,呢日壹仔真係好好彩,行街嘅時候撞到佢,見佢喺媽咪開嘅美容店幫手執頭執尾。

雖然黃智雯已經35歲,但佢同媽咪一樣keep得好好,兩個執嘢好合拍,一睇就知佢哋感情好好。

閂門關舗,黃智雯好似細路女咁繞住媽咪行,以為佢哋返屋企,點知原來去行街市。

兩母女先去菜檔買咗斤菜,然後又去買生果,再買咗啲魚,行過生果檔見到布冧靚,又買咗幾隻,早有準備嘅黃智雯,唔只負責俾錢,仲將全部嘢放落環保袋度,孝順又環保!

買完嘢,二人急步離開,黃智雯全程都扶住或者繞住媽咪,又唔介意行街市,咁貼地嘅一個女藝人,演技又好,唔怪得深得民心

網民熱捧,今年嘅視后,黃智雯睇高一線!

攝錄:陳亦龍、吳斯金

立即下載Apps,隨時隨地睇盡時政專題、深度偵查、娛樂熱話!

按此連結:http://bit.ly/next28app

鍾意就快D Share啦!