今年8月剛踏入60歲嘅「綠葉王」高俊文，當年經常喺無綫劇集做專業人士角色，13年佢加盟王維基旗下嘅香港電視網絡（HKTV），點知因為政府唔發牌，令好多電視人包括高俊文在內加入失業大軍行列。
原來高俊文好似李中寧一樣，已經轉咗行做保安，今日有周刊登咗高俊文喺一間連鎖百貨公司做保安嘅相，高俊文接受訪問時，話現時收入穩定，好過以前做藝人，又話自己唔會再拍番嘢。所謂行行出狀元，最緊要活得開心同健康。《蘋果》曾多次聯絡高俊文，但未獲回覆。至於早年同高俊文過檔港視嘅張松枝，對高俊文轉行一事話唔清楚：「佢都轉咗行，我都唔方便講啲乜嘢。」
高俊文係78年無綫第7期藝員訓練班出身，同甘國衛及已故嘅鄺佐輝係同屆畢業生，喺無綫經常扮演專業人仕，例如《學警出更》做教授、《通天幹探》、《怒火街頭》及《律政新人王》做法官等等，又同鄧萃雯拍過《巾幗梟雄之義海豪情》等劇。
13年高俊文過檔港視，因為港視不獲發牌，佢同成班港視員工連續兩晚喺政總門外抗議，仲同陸駿光、張松枝及郭鋒上演撐港視嘅《半澤直樹》短劇，飾演部長角色。之後佢接受《蘋果》訪問時，自爆70年代因為被指拒接無綫監製王天林通告而無奈離開無綫，到2000年佢再返無綫，又因為拍《楚漢驕雄》墮馬受傷一事同無綫有訴訟，後來拍《我的野蠻奶奶》做皇帝，點知第一日開工遇着「阿姐」汪明荃，由於自己唔爭氣成日NG，被阿姐話佢冇做功課，自己同阿姐拗咗幾句之後，第二日就被換角。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|