索女愛窮男有冇好結果？喺沙律張沛樂同「基界男神」林耀聲身上或許會搵到答案。
日前《蘋果》讀者Sam透過「爆相爆片」，表示當日傍晚6點左右，喺銅鑼灣時代廣場見到林耀聲同沙律一齊，企喺垃圾桶旁邊食煙，佢話﹕「當時喺放工時間，都幾多人，但沙律幾靚女，所以留意到。沙律好似冇食煙，一邊撳電話，一邊等男友食埋支煙先拖住手落地鐵搭車。」
沙律早前孖住人妻趙詠瑤（Kimi）一齊推出寫真遊記，大騷33E激凸身材，仲拍埋啤酒廣告，多人認得唔出奇。有靚樣又有身材，自然不乏有錢仔追求，但沙律就係睇唔上眼，沙律接受《蘋果》訪問時直言獨愛林耀聲，佢回覆話﹕「我唔怕捱麵包㗎，大家都有工作有錢搵，一齊努力為自己將來，我鐘意呢種感覺。其實我好怕，同埋唔鐘意有錢仔追我，唔會同佢地一齊，因為我嘅好條件唔係用嚟吸引錢，要用嚟吸引真心愛我，對我好嘅男人。錢呢樣嘢自己搵係屬於自己，而且阿聲佢嘅吸引之處，係佢少說話多做事，佢有努力為我地將來，我鐘意一齊努力嘅生活，並不是被養或行捷徑嘅生活。」
唔經唔覺，沙律同阿聲拍拖已有兩年多，阿聲喺唔止一次訪問中透露自己出身窮，初入行時冇戲拍，要打二、三十份散工，包括地盤、裝修、冷氣、壽司學徒、剪髮學徒等等，又試過一日三餐齋啃光酥餅頂肚，總之就係冇錢，被迫做隱青。直至電影《點五步》之後，阿聲先多咗人認識，如今與女友沙律一齊喺事業上拼博，亦唔介意喺社交網放閃，大方去愛。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|