掃呢頁CODE去手機

2018年12月6日 星期四

黃子恆:【足本訪問】迪子爆黃子恆扮深情扮正經 __,迪子,黃子恆,

迪子指黃子恆再搵佢講奇怪說話,係喺佢SM味濃嘅《一蓮托生》MV出咗之後!藝人黃子恆被爆曾想約歌手迪子「提供服務」,迪子透露自去年初推出有SM感覺的《一 ...


迪子指黃子恆再搵佢講奇怪說話,係喺佢SM味濃嘅《一蓮托生》MV出咗之後!


藝人黃子恆被爆曾想約歌手迪子「提供服務」,迪子透露自去年初推出有SM感覺的《一蓮托生》MV後,對方就開始向她傳一些奇怪露骨訊息,更講到明想「開房」,但迪子都一一推卻,更講到明自此不會再當對方是朋友,以後會帶眼識人。

記者:點識黃子恆?

迪子:我識咗佢好耐,入行前夾band啲friend介紹識。

記者:識咗幾年?

迪子:超過十年。

記者:你同佢一直係咩關係?

迪子:普通朋友關係,佢以前有跟過我學琴。

記者:幾耐之前?

迪子:我諗都有五、六年前,佢第一堂就畀咗十堂錢,但淨係學咗兩堂。

記者:想同你混熟先搵你學琴?

迪子:好多朋友都搵我學琴,我教琴呀嘛!

記者:你哋之前有冇約過出嚟出街?

迪子:有㗎,普通朋友出嚟食飲嘢傾吓偈。

記者:單獨出嚟?

迪子:係呀,但我哋識咗十年都冇事,直至之前就send咗嗰啲奇怪訊息畀我,我唔知佢當講笑定認真真係想,咁我當佢講笑,我咁樣回應番佢,佢都唔應該小器,如果佢當玩嘅話。

記者:你推佢,佢就用粗口鬧你。

迪子:我就有啲嬲嘅,因為冇乜人夠膽用粗口鬧我。

記者:你之後冇再應佢?

迪子:係,之後佢再搵我,其實佢搵我每次都好似有啲嘢幫手做,可能有啲嘢佢唔識整,每次都有唔同藉口搵我,最後一次撩我開live,但因為我上年受咗傷,心情都唔好,開咩live啫!

記者:佢第一次搵你話「提供服務」有冇嚇親,講啲咁露骨嘅嘢?

迪子:其實佢之前講埋啲嘢都已經好怪,可能約你開房,但我切切實實話佢聽我唔會同佢開房,我唔會同朋友做呢啲嘢,淨係同男朋友。

記者:佢話開房你有冇嚇親?

迪子:我唔知佢講笑定講真,我當佢講笑,但我都明確同佢講唔會開房。

記者:佢幾時開始搵你講啲奇怪說話?

迪子:好似自從《一蓮托生》MV(充滿SM感覺的MV)出咗之後。

記者:你同佢本身都冇男女之間嘅好感?

迪子:已經做咗咁多年朋友。

記者:你哋單獨出嚟飲過酒?

迪子:飲過咖啡,都有飲過酒,真係一次起兩次止,因為以前係一大班friend咁識,會冇乜防範,我真係啱啱讀完書就識佢,十幾廿歲識嘅friend會冇乜防範,覺得佢如果有企圖應該一早就會有企圖,唔會識咗十幾年冇啦啦有興趣,同埋啲friend識得我耐都係當我男仔。

記者:佢近年突然對你咁有冇覺得好奇怪?

迪子:係呀,因為我唔覺得對住識得好耐嘅朋友有女性特質,我對啲識咗好耐嘅男性朋友會粗聲粗氣,所以我覺得佢突然咁好奇怪,唔鍾意咁樣,同埋朋友對我好重要,識咗咁耐,依家冇咗認識十幾年嘅朋友好可惜,其實我唔想咁。

記者:有冇單獨去過佢屋企?

迪子:我去佢屋企教琴,但真係朋友咁。

記者:冇發生任何嘢?

迪子:上堂真係好正經嘅,真係上堂。

記者:自從幾時冇再應佢?

迪子:就算佢講啲好無賴嘅嘢我都仲有睬佢,但因為佢啲回答同行為愈嚟愈過分,覺得佢要改,但佢似乎唔識改,如果唔係唔會發生呢件咁大件事(搭上女粉絲),大人要負責番自己嘅後果,但其實小朋友係最無辜,如果4個月嘅話已經係個BB,係人命,BB先係最大嘅問題,我覺得我呢啲好小事。

記者:佢發生呢件事你有冇搵佢?

迪子:梗係冇我又唔係佢阿媽,呢啲應該佢屋企人教

記者:同佢依家再冇聯絡?

迪子:冇呀。

記者:唔再係朋友?

迪子:唔會再係朋友。

記者:你知唔知朋友圈中,佢仲有冇撩其他女仔?

迪子:唔知呀。

記者:憎呢個人?

迪子:對佢冇感覺,但佢會成日扮深情講嘢,又會扮正經。

記者:畀佢搞到心動過?

迪子:係會令我覺得自己係咪誤會咗佢。

記者:有指佢因為呢件事事業玩完,會畀無綫雪藏,覺得佢應得?

迪子:我唔知呀,但我好相信因果,如果真係天生我才必有用,就算佢唔做呢份工,如果佢肯努力,喺呢個社會都可以搵到嘢做嘅,又未到絕路,如果佢真係改嘅話。

記者:如果佢搵你會唔會幫佢?

迪子:吓,我唔想理呀,得唔得呀?依家覺得麻煩事都係少理好啲,同埋要小心啲識朋友,雖然覺得可惜,但真係要捨棄損友好啲。

記者:其實除咗佢,係咪都有唔少男仔成日咁樣撩你?

迪子:係呀,所以都係件好事嚟,唔好再嚟惹我啦,我係唔惹得嘅,麻煩事我唔想搞咁多,有時間做啲有意義嘅事好過。


來源 source: http://hk.on.cc
鍾意就快D Share啦!