無綫資深綠葉王俊棠，成日被安排飾演江湖惡霸等角色。無計啦，鬼叫佢天生惡形惡相咩，就連喺高級餐廳歎下午茶，膚色黝黑嘅佢睇起嚟都係兇神惡煞，好彩身邊嘅老婆開籠雀咁笑逐顏開咋，如果唔係隨時嚇親啲侍應唔敢行埋去serve呀。之後一身全黑打扮好似行古惑嘅大仔姍姍來遲，王俊棠只係外表凶狠啫，唔會為呢啲小事黑面嘅，反而即刻拎出電話一家三口嚟個selfie添。
話時話，呢個大仔都有幾分老竇真傳，可以考慮下入行做無綫御用惡人二代喎。不過記得王俊棠講過大仔已經成家立室，所以只會擔心孻仔王東泰，更喺孻仔17歲時已安排加入無綫，主持過《放學ICU》，拍過《愛 回家》。儘管孻仔外形唔錯，身高更有190cm，但好多監製見過真人後話太高難拍劇，所以短短兩年孻仔就離開無綫，經老竇搭路返內地做嘢，直至2016再以特約演員身份幫無綫工作。
講起孻仔，王俊棠真係慈父一個嚟架，處處為個仔著想，佢曾經講過：「佢自己都無能力照顧自己，所以無諗過佢會養我，反而我想佢返內地發展，因為內地機會多啲。不過，佢都要準備自己，要學唔同範疇，等候機會嚟臨。個仔仲處於方向未明階段，而且個樣太細個，等多幾年等佢成熟啲啦，會多啲機會。我講係無用，我都會用自己人脈，幫佢喺內地搵工，等外人嚟教佢。始終佢喺溫室長大，要俾時間佢成長，佢可以做得再好啲。」霸氣十足嘅王俊棠講出呢段說話，特別顯得充滿住愛。
來源 source: http://nextplus.nextmedia.com
|
鍾意就快D Share啦！
|
|
|
