掃呢頁CODE去手機

2018年12月15日 星期六

【沙煲兄弟】陳志雲唔嗌交有秘技 王喜買飯督工勁溫馨 __,王喜,陳志雲,

日前志雲喺深水埗開工,王喜買埋外賣探班。(攝影:吳耀輝、梁繼光)
陳志雲同王喜係風雨同路嘅沙煲兄弟,日前下午1點左右,志雲喺深水埗為香港開電視拍攝《志雲拆局》外景,王喜專登買埋外賣去探班。《蘋果》記者當日見王喜去到現 ...


陳志雲同王喜係風雨同路嘅沙煲兄弟,日前下午1點左右,志雲喺深水埗為香港開電視拍攝《志雲拆局》外景,王喜專登買埋外賣去探班。



《蘋果》記者當日見王喜去到現場企埋一邊睇,有時又會用手機影志雲。其間好多途人走上前搵志雲同王喜合照,佢哋都冇托手踭。攝製隊休息期間,王喜就攞咗兩盒沙律同冷麵同志雲開餐。原本佢哋喺街邊「立食」,附近有南亞裔人見到,仲好熱情咁攞兩張凳畀佢哋坐低食,兩個人邊食邊傾偈,場面真係好溫馨。



記者上前講到王喜買外賣畀志雲食好老友,王喜就話:「我唔係探班,我係嚟督工。呢個鐘數食飯吖嘛,佢外景完又開廠,應該冇乜時間食飯。」講到志雲本月20日會喺演藝學院演出舞台劇《主席萬歲萬萬歲》,呢排好忙,王喜就搶住話20日當日係志雲60大壽,又指志雲當日開工其實別有用心:「都應該係公器私用㗎啦,搏多啲人同佢慶祝生日。」咁有冇買禮物畀志雲?王喜話:「唔使㗎啦,買票得㗎啦。」



講到志雲同王喜成日見面,志雲話:「王喜話佢通常見得太密嘅朋友會好容易反面,所以佢自己有一個量度表,見幾多次之後就唔好再見,太好朋友會有拗撬,但我就叫佢安心,我係唔會同佢拗,因為佢一拗,我就唔會出聲,我喺個心裏邊拗,兩個人一齊嗌先得,所以我唔會同佢嗌交。」



雖然志雲話唔會同王喜嗌交,但佢講到日前王喜幫佢拍一條宣傳電視節目同舞台劇嘅宣傳短片時,志雲竟然同王喜真係嘈起上嚟。志雲大爆日前動用10部貨櫃車拍攝,貨櫃車喺馬路兩邊,志雲企喺馬路中間擔住遮,期間志雲做代言人嘅廣告客戶老闆到場探班,見王喜淋緊雨,於是好心擔遮走埋去王喜度遮住佢,點知王喜發咗癲咁鬧人,大聲喝對方:「行開啦你!」搞到個老闆唔知點反應同有啲黑面。



志雲提起呢件事都有啲㷫話:「大佬,嗰個請我做代言㗎,你唔好同我趕客呀!」但王喜就解釋,話當日嗰10個貨車司機未參與過拍攝,由於個鏡頭係臨時即場度,同一時間要10幾20人配合,拍攝機會可能只得一個:「突然有人走出嚟拉住我,話幫我手擔遮,NG咗要10架車掉頭返嚟再拍。」王喜越講講勞氣:「佢推我隻手要暫停咗部機吖嘛,錄唔到咪要嚟過囉!原本可以一take搞掂,個10個貨櫃車司機從來唔清楚乜嘢叫拍攝,我哋冇申請,條路要封咗佢,我係咪要把握一次嘅機會完成咗佢,而你又唔使淋雨同冒險畀車車到......。」



雖然志雲講到有啲忟憎,但最後都讚番王喜係一個好人同好有才華嘅人。



攝影:吳耀輝、梁繼光



【編輯推介】



【卓林欠租搵阿媽出手】 「一家三口」去銀行 吳綺莉緊閉雙唇不發一言

https://bit.ly/2GebpKY



【真係好驚喜!】張栢芝幫許廷鏗拍片拉票 殺入叱咤10強撼古天樂

https://bit.ly/2LhC0FV



【一代宗師】李小龍離世45年 九龍塘故居內部清拆

https://bit.ly/2Qx01OX



【有洋蔥】《蜘蛛俠:跳入蜘蛛宇宙》動畫版Stan Lee現身鼓勵主角

https://bit.ly/2Bk1Q7w



【《MAMA》頒獎禮】大贏家BTS奪年度歌手 TWICE爆喊奪年度歌曲

https://bit.ly/2LhkT74



精選娛聞,喺晒《娛果》

http://fb.com/appledailyent



日前志雲喺深水埗開工,王喜買埋外賣探班。(攝影:吳耀輝、梁繼光) 志雲訪問正生書院校長陳兆焯。(攝影:吳耀輝、梁繼光) 志雲訪問正生書院校長陳兆焯。(攝影:吳耀輝、梁繼光)
王喜去深水埗探志雲班。

王喜去深水埗探志雲班。
 兩個本來喺街立食。

兩個本來喺街立食。
 有人攞凳畀佢哋坐低食。

有人攞凳畀佢哋坐低食。
 邊食邊傾。

邊食邊傾。
 志雲指王喜得罪佢代言客戶。

志雲指王喜得罪佢代言客戶。
志雲講講吓同王喜拗起上嚟。

志雲講講吓同王喜拗起上嚟。

鍾意就快D Share啦!