現年36歲無綫小生、曾搭上人妻裕美嘅黃子恆，近日被爆偷嗒內地女粉絲，女方大爆被黃子恆搞大個肚，男方居然唔認數！衰開有條路嘅黃子恆，噚日被爆約35E巨胸歌手迪子到屋企「互相服務」，被拒後更爆粗鬧迪子。
凍凍哋搵嘢搞
噚日有報料指黃子恆試過約迪子去開房，仲猛落嘴頭話細酒店價錢好平，但擔心要用身份證登記入住，提議改去九龍塘。噚日有兩人嘅對話截圖流出，事發日期係前年10月31日，其實前年6月，黃子恆被爆偷食人妻裕美，形象一度跌落谷底。
估不到短短4個月後，當時拍緊劇集《降魔的》嘅黃子恆，被指留言約迪子去九龍塘玩「人魔大戰」，但俾迪子拒絕：「我對SP（sex partner）關係冇興趣」有人事隔5小時後再短訊撩爆房，女方依然請食檸檬。除對話截圖外，仲有疑似黃子恆聲帶流出，男聲衰衰咁撩迪子：「咁full呀，下個禮拜二？冇嘅，睇吓有乜嘢搞之嘛，凍凍哋。」
㩒鐘仔錢都慳
有人似乎對爆乳迪子特別嗒糖，其後又畀信用卡資料叫迪子代搞續領特區護照。迪子承認曾被黃子恆撩開房：「梗係有啲嬲，咁樣問好唔尊重，即係佢當女人係乜呢？我覺得你有需要咪去㩒鐘仔囉，畀錢之嘛，呢啲錢都要慳，哈哈！可能屋企人冇教佢點樣尊重人囉，惟有話我可能體諒佢呢樣嘢囉。」
撰文：馮仁昭
|
鍾意就快D Share啦！
|
|
|