擁有35E逼爆身材嘅莊端兒(Xenia)自從加入杜汶澤自家網台，用「事業心」報道一周大事，即成為網上紅人。但估唔到「Double May」都要過Lonely Christmas，莊端兒日前接受《蘋果》專訪，話聖誕節冇約人，所以好平安：「(與張致恒)分手兩年幾都冇拍拖，雖然一直有人追，但難得多咗人認識，唔想嘥時間喺拍拖上，因為知道自己一拍拖就會好投入。」
Xenia透露媽咪都有介紹男人，笑言全部家境都唔錯，佢話：「唔算帥，但環境唔錯囉，覺得好老土，好似相睇咁。」問到擇偶條件？佢話：「最緊要唔好食煙，我有嚴重氣管敏感，一咳就咳到甩肺，孝順、專一呢啲基本嘢，最好有經濟能力，起碼負擔到自己，咁先可以照顧到人。」使唔使接受埋性感演出？Xenia話：「真係唔係個個男朋友都接受到，但有時有啲性感，又有好多宅男鍾意你，但如果有（追求者），現階段我都ban埋。」問到會否雪卵後？佢話：「身邊好多朋友都有做，但聽講幾痛，又會肥，我o依家身體機能都幾好，所以唔使雪住。」
人氣升，莊端兒今年首度接拍賀歲片《如珠如寶》，第一次做「女主角」波波姐，佢話：「係戲中戲嘅女主角，講我係性感女神，驄哥（林敏驄）買咗件加細碼泳衣畀我，有場戲要不停跳跳跳，但點跳都整唔甩，因為真係好緊。」佢話為咗呢場戲積極減肥，由高峰132磅減到現在118磅，問到有乜秘訣？佢話：「真係地獄式，用咗兩個幾月時間，食少好多嘢。因為我之前割咗個膽，本來已經食得好清，油炸嘢唔食，飲多好多水，原來水好重要，越飲得水少越容易水腫，仲有焗身、跑步同游水。」
對票房有冇信心？Xenia話：「有呀！我哋賣搞笑之餘，仲賣親情，家有一老如有一寶，可以一家大細一齊睇。」
採訪：嵐山
攝影；林德雄
攝錄：廖達燊
化妝及髮型；faye’s makeover
精選娛聞，喺晒《娛果》
http://fb.com/appledailyent
| 莊端兒首度拍賀歲片，在《如珠如寶》中飾演波波姐。(攝影﹕林德雄) | | |
| | |
|
鍾意就快D Share啦！
|
|
|
